هونەرمەندان بە چاوی پڕ فرمێسکەوە ماڵاوایی لە 'زاهیر عەبدوڵڵا' دەکەن

ئاڤا نیوز

 

هونەرمەندان و خەڵکی کوردستان بە کۆچی دوایی هونەرمەند "زاهیر عەبدوڵڵا" خەمگینن و هاوسۆزی خۆیان بۆ خانەوادەکەی دەردەبڕن.

 

چیرۆکی سەرەکی: ئێوارەی ئەمڕۆ 23-11-2024، بەهۆی نەخۆشیی شێرپەنجەوە هونەرمەندی ناسراو و دیاری کوردستان "زاهیر عەبدوڵڵا" کۆچی دوایی کرد.

 

پەیامی هونەرمەندانی کوردستان بۆ کۆچی دوایی زاهیر عەبدوڵڵا

 

ئەیام ئەکرەم، هونەرمەندی بواری شانۆ و دراما کە بە "شەمۆ" ناسراوە، بە چاوی پڕ فرمێسکەوە تەرمی "زاهیر عەبدوڵڵا" ماچ دەکات، بۆ ئاڤا گوتی: جوانترین یادەوەریم لەگەڵ ئەم پیاوە جوانە هەیە، بەگشتیی هاندەرێکی باشی هونەرمەندان و خەڵک بوو.

 

 

کاروخ ئیبراهیم، دەرهێنەری فیلم و شانۆ، بە ئاڤا نیوزی گوت: کەسێک بوو بەردەوام ڕاوێژم پێدەکرد، کۆچی دوایی بۆشاییەکی گەورە دروست دەکات.

 

 

ئیبراهیم حەکیم، هونەرمەندی بوای شانۆ و دراما، بە دەم گریانەوە بۆ ئاڤا نیوز دەڵێت: وردە وردە هونەرمەندە دێرینەکان نامێنن، پێش حەوت ڕۆژ سەردانی زاهیرم کرد و نەیدەناسیمەوە، ئەوەش توشی شۆکی کردم.

 

 

 حاجی جادر، هونەرمەندی بواری کۆمێدیا لەبارەی کۆچی دوایی هونەرمەند "زاهیر عەبدوڵڵا" دەڵێت، ئەو جوانترین قوتابخانەی لە هەولێر جێهێشت بۆ هەموو کوردستان.

 

 

 

ئەوەی پێویستە بیزانیت: زاهیر عەبدوڵڵا خەڵکی هەولێرە و لە خێزانێکی هونەری و نیشتمانپەروەرە، هاوکات نزیکەی 50 ساڵە لە بواری شانۆ و دراما کاری کردووە، یەکێکە لە هونەرمەندە خۆشەویستەکانی باشووری کوردستان.