حکومەتی عێراق 10 بەشە گەنم بە هەرێمی کوردستان دەدات

ئاڤا نیوز

 

چاوەڕوان دەکرێت جیاواز لە ساڵانی ڕابردوو حکومەتی عێراق بۆ ئەمساڵ 10 بەشە گەنم بۆ دروستکردنی ئارد و دروستکراوەکانی دیکەی گەنم بە هەرێمی کوردستان بدات، بەرپرسی بەشی هونەری لە بەڕێوەبەرایەتی دروستکراوەکانی دانەوێڵە دەڵێت، "تاوەکو ئێستا نۆ بەشە گەنممان وەرگرتووە و دەیانگوازینەوە بۆ ئاشەکان".

 

لێدوانی فەرمی: لادێ ئیبراهیم، بەرپرسی بەشی هونەری لە بەڕێوەبەرایەتی دروستکراوەکانی دانەوێلە لە وەزارەتی بازرگانی و پیشەسازی حکومەتی هەرێمی کوردستان، بە ئاڤا نیوزی ڕاگەیاند: تاوەکو ئێستا نۆ بەشە گەنممان لە عێراق وەرگرتووە، بەڵام بۆ ئەمساڵ چاوەڕوان دەکەین 10 بەشە گەنم وەربگرین.

 

ئەو بەرپرسەی وەزارەتی بازرگانی و پیشەسازی گوتی: پرۆسەی گواستنەوەی گەنم بۆ ئاشەکان لە ئەمڕۆ 24-11-2024 لە هەولێر دەستیپێکرد، ڕەنگە سبەی دووشەممە لە دهۆک دەستپێبکات.

 

ژمارەکان وادەڵێن: لادێ ئیبراهیم دەڵێت: بۆ ئەمساڵ هەولێر 22 هەزار و 532 تۆن گەنم، سلێمانی 23 هەزار و 537 هەزار تۆن گەنم، دهۆک 14 هەزار و 689 تۆن گەنمی بۆ ئاردی بۆ تەرخان کراوە.

 

زانیاریی زیاتر: بەغدا بەگوێرە ئامار بڕی بەشە گەنمەکان دیاری دەکات، واتە هەموو بەشەکان یەک بڕ نین.

 

ئەوەی پێویستە بیزانیت: ساڵی 2022 تەنیا پێنج بەشە گەنم، 2023 تەنیا هەشت بەشە گەنم، بۆ ئەمساڵ تاوەکو ئێستا نۆ بەشە گەنم لەلایەن حکومەتی عێراقەوە بە هەرێمی کوردستان دراوە، لادێ ئیبراهیم دەڵێت "بۆ ئەمساڵ چاوەڕوان دەکرێت 10 بەشە گەنم بە هەرێمی کوردستان بدرێت".

 

لە گۆشەیەکی دیکە: ئەو گەنمەی بۆ ئاشەکان دەگوازرێتەوە سەرەتا دەشۆردرێتەوە، هەنگاوی دووەم دەهاڕدرێت و کۆتا هەنگاو دەکرێت بە ئارد، ئەم پرۆسەیە پێویستی بە سێ ڕۆژە.