وەزارەتی خوێندنی باڵا بەدواداچوون بۆ لیستی ناوی وانەبێژان دەکات

ئاڤا نیوز

لیژنەیەک لە وەزارەتی خوێندنی باڵا و توێژینەوەی زانستی پێکهێنراوە و سەردانی زانکۆ حکومییەکان هەرێمی کوردستان دەکات، وردبینی و بەدواداچوون بۆ لیستی ئەو وانەبێژانە دەکات کە بڕیاری بەگرێبەستکردن دەیانگرێتەوە، گرێبەست بۆ ئەو وانەبێژانە دەکرێت کە لە چاوپێکەوتنی لیژنەکە سەرکەوتوو دەبن.

 

وێنە گەورەکە: چوار هەزار و 104 وانەبێژی زانکۆ و پەیمانگەکان پرۆسەی بایۆمتریان تەواوکردووە و لە قۆناغی کۆتایی مامەڵەی بەگرێبەستکردنیاندان، تەنیا سێ زانکۆی هەرێمی کوردستان ماون کە لەلایەن لیژنەکەوە سەردانیان بکرێت، وردبینی لە زانکۆکانی دیکە تەواو بووە.

 

زانیاریی بەدەستهاتوو: لە چاوپێکەوتنی لیژنەی وەزارەتی خوێندنی باڵا کە لەگەڵ سەرجەم وانەبێژان دەکرێت، پێداچوونەوە بە فەرمانی زانکۆ دەکرێت کە وەک وانەبێژ دەستبەکار بووە، لیستی وەرگرتنی پارەی مانگانە، پێداچوونەوە بە خشتەی وانەگوتنەوە و بەشێکیشان گرێبەستی وانەگوتنەوەیان هەیە پێداچوونەوەی لێدەکرێت، ئینجا گرێبەستیان بۆ دەکرێت.

 

لێدوانی فەرمی: د. توانا نەجەف، سەرۆکی دیوانی وەزارەتی خوێندنی باڵا و توێژینەوەی زانستی بە ئاڤا نیوزی گوت، "کاری لیژنەکە لە بەشێکی زانکۆکان تەواو بووە، هەر وانەبێژێک پێشینەی کارکردنی نەبێت و زانیارییەکانی نادروست بن گرێبەستی بۆ ناکرێت."

 

زانیاریی تایبەت: بەگوێرەی بەدواداچوونی ئاڤا لە مووچەی مانگی 11ـەوە مووچەی مامۆستایانی گرێبەستی زانکۆ و پەیمانگەکان دەبەسترێت، بەگوێرەی بڕوانامەکانیان مووچەیان لە 500 هەزار بۆ یەک ملیۆن و 250 هەزار دینار دەبێت.