کۆمپانیایەکی نوێ لە کێلگە نەوتی و گازییەکانی کەرکووک دەستبەکار دەبێت

ئاڤا نیوز

 

پارێزگاری کەرکووک ڕایدەگەیێنێت، لە ساڵی نوێدا کۆمپانیای  BP ـی بەریتانی کە لە بواری نەوت و گاز کاردەکات، لە کەرکووک دەست بەکارەکانی دەکات.

 

چیرۆکی سەرەکی: 1-8-2024، نووسینگەی محەممەد شیاع سوودانی، سەرۆکوەزیرانی عێراق واژۆکردنی گرێبەستێکی سەرەتایی لەگەڵ کۆمپانیای BPـی بەریتانی ڕاگەیاند، ئەوکات نووسینگەی سوودانی  ئەو ڕێککەوتنەی بە هەنگاوێکی نوێ وەسفکرد کە ئامانج لێی پەرەپێدانی کێڵگە نەوتی و گازییەکانی باکووری کەرکووکە.

 

ڕاگەیێنراوی فەرمیی: ڕێبوار تەها، پارێزگاری کەرکووک، لە کۆنگرەیەکی ڕۆژنامەوانیدا ڕایگەیاند: "وەکو ئیدارەی نوێی کەرکووک، ئاسانکاریی بۆ کارەکانی کۆمپانیای BPـی بەریتانی، دەکەین بۆ ئەوەی بێنە کەرکووک و  کار بکەن، چونکە هاتنی ئەو کۆمپانیایە سوودی زۆر دەبێت".

 

زانیاریی زیاتر: لەبارەی وادەی دەستبەکاربوونی کۆمپانیاکە لە کێڵگە نەوتییەکانی کەرکووک ڕێبوار تەها گوتی، دوای ئەوەی ڕێکارەکان لە وەزارەتی نەوت تەواو دەکرێت، پێموایە لە مانگی شوباتی 2025، دەست بەکارەکانیان دەکەن.

 

ڕێککەوتنەکە بەمشێوەیە: کۆمپانیا بەریتانیەکە گەشە بە هەموو کێڵگە نەوتییەکان دەدات و کار لەسەر دۆزینەوەی کێڵگەی نوێش دەکات، هەروەها وەبەرهێنان لەبواری گازدا دەکات، ئەمەش دەبێتە هۆی ئەوەی گەنجانی شاری کەرکووک هەلی کاریان بۆ بدۆزرێتەوە.