یەکەی 80 خرایە سەر وەزارەتی پێشمەرگە

ئاڤا نیوز

لە چوارچێوەی یەکخستنەوەی هێزەکانی پێشمەرگە، هێزەکانی یەکەی 80 مامەڵە یاساییەکانیان تەواوبووە و لە چوارچێوەی "فەرماندەیی دەڤەر" خراونەتە سەر وەزارەتی پێشمەرگە، هێزەکانی یەکەی 70 لە ئایندەیەکی نزیک مامەڵەی گواستنەوەیان تەواو دەبێت.

چیرۆکی سەرەکی: کۆتایی ساڵی ڕابردوو وەزیری پێشمەرگە و ئەمینداری گشتیی هێزەکانی پێشمەرگە و سەرۆک ئەرکان لەگەڵ فەرماندەی یەکەکانی 70 و 80 کۆبوونەوە، لەبارەی یەکخستنەوەی هێزەکانی پێشمەرگە و بەرنامە و پلانەکانەوە گفتوگۆیان کرد، لەسەر ئەوە ڕێککەوتن کە دوو فەرماندەیی دەڤەر لەژێر سێبەری وەزارەتی پێشمەرگە پێکبهێنرێت و هەردوو یەکەکە لەو چوارچێوەیە یەکبخرێت.

لێدوانی فەرمی: سەرچاوەیەک لە وەزارەتی پێشمەرگە بە ئاڤای گوت، "فەرماندەیی یەکەی 80 خراونەتە سەر فەرماندەیی دەڤەر یەک و ئێستا لە چوارچێوەی وەزارەتی پێشمەرگە دەبن، پێش کۆتایی ئەمساڵ یەکەی 70ـش تەواو دەبێت و لەچوارچێوەی فەرماندەیی دەڤەر دوو دێنە ژێر چەتری وەزارەتی پێشمەرگە."

باکگراوند: ساڵی 2022 لێکتێگەیشتنێک لەنێوان حکومەتی هەرێمی کوردستان و پێنتاگۆن بۆ یەکخستنەوەی هێزەکانی پێشمەرگە کراوە، بۆ ئەوەی پێش مانگی 10ـی ساڵی 2026  یەکخستنەوەی هێزەکان پێشمەرگە کۆتایی بێت.