وەزارەتی تەندروستی لەڕێگەی ئاڤا بەڵێنی چارەسەریی گرفتەكانی بەردەم نەشتەرگەریی نەخۆشێك دەدات

ئاڤا نیوز

وەزارەتی تەندروستی لەڕێگەی بەرنامەی مۆری ئاڤاوە دێتە سەر هێڵ و بەڵێنی چارەسەریی سەرجەم گرفتەكانی بەردەم نەشتەرگەیی كچێكی تەمەن شەش ساڵان دەدات.

چیرۆكی سەرەكی: بەهۆی ڕێكارە ئەمنی و كارگێڕییەكانی ئەنجامدانی نەشتەرگەریی چاندنی جگەر، ژیانی كچێكی تەمەن شەش ساڵان بە ناوی جودی محەممەد لەمەترسیدایە؛ پزیشكەكان وتوویانە، "دەبێت لە زووترین كاتدا نەشتەرگەری چاندنی جگەری بۆ بكرێت"، باوكی دەڵێت: "ئامادەم جگەری خۆمی پێشكەش بكەم و بڕی چوار دەفتەر دۆلاری نەشتەرگەرییەكەش هەرچۆنێك بێت دابین بكەم، بەڵام ڕێكار و ڕۆتینە یاسایی و ئەمنی و كارگێڕییەكانی بەردەم نەشتەرگەرییەكەیە، كاتێكی زۆر دەخایێنێت و ڕۆژ لەدوای ڕۆژیش تەندروستیی كچەكەم خراپتر دەبێت."

ئەوەی پێویستە بیزانیت: بەپێی ڕێنماییەكانی وەزارەتی تەندروستیی حكومەتی هەرێمی كوردستان، ئەنجامدانی نەشتەرگەریی گواستنەوەی ئەندامەكانی جەستە، پێویستی بە ڕەزامەندیی ئاسایش و دەزگا ئەمنییەكان هەیە، لەچوارچێوەی گرتنەبەری ڕێكارەكانی بەرەنگاربوونەوەی تاوانی بازرگانیكردن بە ئەندامەكانی جەستەی مرۆڤ.

لێدوانی فەرمی: لەكاتی خستنەڕووی كەیسی ئەو كچە لە بەرنامەی مۆری ئاڤا، بەرپرسێكی باڵا لە وەزارەتی تەندروستی پەیوەندی كرد و ئامادەیی وەزارەتەكەی دەربڕی بۆ هەموو جۆرە ئاسانكارییەك لەپێناو چارەسەركردنی گرفت و بەربەستەكانی بەردەم ئەنجامدانی نەشتەرگەری چاندنەوەی جگەر بۆ جودی.

کاریگەریی و کاردانەوەکان: محەممەد ئەبوبەكر، باوكی جودی، سوپاسی ئاڤای كرد كە هەمووكات بەدەم چارەسەركردنی كێشەكانی خەڵكەوەیە و لە زووترین كاتدا لایەنی پەیوەندیدار دەهێنێتە سەر هێڵ.