نەوەی نوێ مەرجەكانی بەشداریكردنی لە حكومەت بە شاندی یەكێتی ڕاگەیاند

ئاڤا نیوز 

 

بەمەبەستی گفتوگۆكردن بۆ پێكهێنانی كابینەی تازەی حكومەتی هەرێمی كوردستان، شاندێكی یەكێتیی نیشتمانیی كوردستان سەردانی جوڵانەوەی نەوەی نوێی لە شاری سلێمانی كرد.

 

وێنە گەورەکە: گەڕی دانووستان و سەردانی لایەنە سیاییەکان بۆ لای یەکتری دەستیپێکردووە، بە ئامانجی پێکهێنانی کابینەی دەیەمی حکومەتی هەرێمی کوردستان، هەر یەکە لە پارتی دیموکراتی کوردستان و یەکێتی نیشتمانی کوردستان بەجیا سەردانی لایەنەکان دەکەن. 

 

زانیاریی بەدەستهاتوو: شاندەكەی یەكێتی پێكهاتبوون لە ڕزگار حەمە و سالار سەرحەد و سەمیر هەورامی، لەلایەن هەریەك لە ڕێبوار ئەوڕەحمان و بەدریە ئیبراهیم و فاروق غەفوور لە نەوەی نوێ پێشوازییان لێكرا.

 

لێدوانی فەرمی: ڕێبوار ئەورەحمان، گوتەبێژی فراكسیۆنی نەوەی نوێ لە پەرلەمانی عێراق لە كۆنفڕانسێكی ڕۆژنامەوانیدا ڕایگەیاند:  پڕۆژە و مەرجی نەوەی نوێمان بە فەرمی دا بە شاندەكەی یەكێتی و وابڕیارە ئەوانیش دوای تاووتوێكردنی، وەڵاممان بدەنەوە.

 

زانیاریی زیاتر: نەوەی نوێ داوا دەكات ئەو لایەنەی كە پۆستی سەرۆكوەزیرانی هەرێمی كوردستان وەردەگرێت، دەبێت دەستبەرداری سەرجەم پۆستەكانی دیكەی حكومەت بێت، هەمان مەرج و پڕۆژەشیان بە شاندی دانوستانكاری پارتی داوە، ئەم مەرجەی نەوەی نوێ لەبەرامبەر بەشداریكردنییەتی لە كابینەی تازەی حكومەتی هەرێمی كوردستان.