وەزیری بەرگری عێراق سەرپەرشتی کۆبوونەوەیەکی تایبەت بە سنووری سووریا دەکات

ئاڤا نیوز

 

ڕووداوەکانی باکوور و ڕۆژئاوای سووریا جگە لەوەی هێزە ئەمنییەکانی عێراقی لەسەر سنوور خستووەتە حاڵەتی ئامادەباشییەوە، لە ئاستی وەزارەتی بەرگرییش چەند کۆبوونەوەیەک ئەنجامدران و تیایدا جەخت لە پارێزراوی ئاسایشی سنوورەکان کرایەوە.

 

وێنە گەورەکە: دوای کۆنترۆڵکردنی حەلەب لەلایەن ئۆپۆزسیۆنی چەکداری سووریاوە، مەترسی زیادبوونی چالاکی ئەو گرووپانە و پەڕینەوەیان بۆ عێراق زیاتربووە، ئەوەش وایکردووە حکومەتی عێراق ڕێکاری توندی ئەمنیی لەسەر سنوور بگرێتەبەر.

 

ڕاگەیێنراوی فەرمی: وەزارەتی بەرگری عێراق ڕایگەیاند: سابت عەباسی، وەزیری بەرگریی گەیشتووەتە فەرماندەیی ئۆپەراسیۆنەکانی ڕۆژئاوای نەینەوا لە سنووری قەزای شنگال و سەرپەرشتی کۆبوونەوەیەکی باڵای ئەمنیی کردووە، ئامانجی کۆبوونەوەش بە مەبەستی ئامادەکاریی پێویست بووە بۆ پاراستنی سنوورەکان و ڕێگریکردن لە هاتنی گرووپە چەکدارەکان بۆ ناو خاکی عێراق.

 

لەلایەکی دیکەوە: قاسم ئەعرەجی، ڕاوێژکاری ئاسایشی نیشتمانیی عێراق ڕایگەیاند، هێزە ئەمنییەکان هەموو ڕێکارێکی خۆپارێزییان گرتووەتەبەر بۆ چاودێریکردنی ئاسایشی سنوورەکان، هیواداریشە حکومەتی سووریا هەموو زەوییەکانی کۆنترۆڵ بکات.

 

لە گۆشەیەکی دیکە: سەرچاوەیەکی ئەمنی عێراق ئاشکرای کرد، پێنج لیوا بە هەموو جۆرە کەرەستەیەکی سەربازییەوە، سێ لیوایان سەر بە سوپان و دوولیوای دیکەیان سەر بەهێزەکانی حەشدی شەعبین بە درێژایی سنوورەکانی نێوان عێراق و سووریا وەک هێزی پشتیوانی بڵاوەیان پێکراوە.