وەزیری دەرەوەی ئێران سبەی سەردانی سووریا دەکات

ئاڤا نیوز

 

عەباس عێراقچی، وەزیری دەرەوەی ئێران لەبارەی ڕووداوەکانی ئەم دواییە سووریا سەردانی دیمەشق دەکات و لەگەڵ بەرپرسانی سووریا کۆ دەبێتەوە.

 

وێنە گەورەکە: ئەمڕۆ شەممە 30-11-2024، ئیسماعیل بەقایی، وتەبێژی وەزارەتی دەرەوەی ئێران، لە کۆنفڕانسێکی ڕۆژنامەوانیدا ڕایگەیاند: عەباس عێراقچی، وەزیری دەرەوەی کۆماری ئیسلامیی ئێران بۆ ڕاوێژ و گفتوگۆ لەسەر پرسەکانی ناوچەکە، بەتایبەت ڕووداوەکانی ئەم دواییە، سبەی یەکشەممە دەچێتە دیمەشق و لەگەڵ دەسەڵاتدارانی سووریا کۆ دەبێتەوە.

 

ئیسماعیل بەقایی ئاماژەی بەوە کرد، عێراقچی لە دوای سووریا، ڕۆژی دووشەممە سەردانی ئەنقەرەی پایتەختی توورکیا دەکات و لەگەڵ بەرپرسانی ئەو وڵاتە تاوتوێی دۆخی ناوچەکە دەکات.

 

باکگراوند: ڕۆژی دووشەممەی ڕابردوو 25ـی تشرینی دووەمی 2024، شەڕ و پێکدادان لە دەوروبەری حەلەب لە نێوان هێزەکانی ڕژێمی سووریا و هێزەکانی ئۆپۆزیسیۆن کە لەلایەن تورکیاوە پاڵپشتی دەکرێن، دەستیپێکرد. بە پێی ئامارەکانیش لە سەرەتای ڕووداوەکانەوە تاکو ئێستا زیاتر لە 300 کەس لە هەردوولا کوژراون.