یەکەم کۆبوونەوەی خولی شەشەمی پەرلەمانی کوردستان دەستپێدەکات

ئاڤا نیوز

 

دوای پەسەندکردنی ئەنجامەکانی هەڵبژاردنی خولی شەشەمی پەرلەمانی کوردستان لەلایەن کۆمیسیۆنی باڵای هەڵبژاردنەکانی عێراق، بڕیارە پێشنیوەڕۆی ئەمڕۆ پەرلەمانی کوردستان یەکەم کۆبوونەوەی خۆی دەستپێبکات.

 

وێنە گەورەکە: بەپێی بڕیاری ماددەکانی 46 و 47 و 48 لە یاسای هەڵبژاردنی پەرلەمانی کوردستان، ئەمڕۆ یەکەم دانیشتنی خولی شەشەمی پەرلەمانی کوردستان، لە کاتژمێر 11ـی پێشنوەڕۆی ڕۆژی دووشەممە 2- 12- 2024 بەڕێوەدەچێت.

 

زانیاریی پەیامنێر: شەوکەت قادر پەیامنێری ئاڤا ڕایگەیاند: ئامادەکارییەکان لە ڕووی کارگێڕییەوە تەواو کراون، بەڵام لە ڕووە یاساییەکەوە بەهۆی نەبوونی ڕێککەوتنی سیاسیی لەنێوان لایەنە براوەکان پێشبینی دەکرێت دوای سوێندخواردنی ئەندامانی پەرلەمان فراکسیۆنی پارتی و یەکێتی کۆبوونەوەکە بەجێبهێڵن.

 

زانیاریی زیاتر: جگە لە فراکسیۆنی کۆمەڵی دادگەری سەرجەم فراکسیۆنە براوەکانی دیکە بەشداری کۆبوونەوەکە دەکەن.

 

ئەوەی پێویستە بیزانیت: دوای پرۆسەی سوێندخواردنی ئەندامانی پەرلەمانی کوردستان، دەرگای خۆپاڵاوتن بۆ سەرۆکایەتی پەرلەمان دەکرێتەوە، بەڵام پێشبینی دەکرێت ئەم بڕگەیە جێبەجێ نەکرێت، هۆکارەکەش نەبوونی ڕێککەوتنی پێشوەختەیە.