چارەنووسی ئەو ئەندامانەی کە بەشداری دانیشتنی پەرلەمان ناکەن

ئاڤا نیوز 

 

یەکەم دانیشتنی خولی شەشەمی پەرلەمانی کوردستان بەڕێوەدەچێت، بەگوێرەی پەیڕەوی ناوخۆ پەرلەمانتاران سوێندی یاسایی دەخۆن، بەشێکیان لە دانیشتنی ئەمڕۆدا بەشداری ناکەن، دەبێت لە ماوەی یەک مانگدا ڕێکارەکانی سوێندخواردن تەواو بکەن، بەپێچەوانەوە شوێنیان بە کاندیدێکی دیکە پڕ دەکرێتەوە، ئەگەر هاتوو لەدوای تەواوبوونی وادەی دیاریکراو بەبێ بوونی بیانوو بەشدار نەبوون.

 

وێنە گەورەکە: بەشێک لە  کاندیدی لایەنەکان لە دانیشتنی یەکەمی پەرلەمانی کوردستان بەشداری ناکەن، هەندێکیان دەیانەوێت بە کاندیدێکی دیکەی حیزبەکەیان شوێنیان پڕبکەنەوە، ئەمەش بەر لە ئاگادارکردنەوەی پێشوەختەی کۆمیسیۆن و پەرلەمان ناکرێت، مەرجە ئەو کاندیدەی کە شوێنی نەهاتوو دەگرێتەوە لە هەمان بازنەی کاندیدی دەرچوو بێت و زۆرترین دەنگی لە نێو دەرچووەکان هەبێت.

 

لێدوانی فەرمی: مەڕوان محەممەد، بەرپرسی ئۆفیسی هەولێری کۆمیسیۆن بە ئاڤا نیوزی گوت: "لەدوای تەواوبوونی وادەی دیاریکراو، پەرلەمان بە نووسراو ئەو حیزبە ئاگادار دەکاتەوە کە کاندیدەکەی بەشداری نەکردووە، ئەگەر پێداگر بوون لەسەر بەشداری نەکردنیان، دواتر پەرلەمان نووسراو بۆ کۆمیسیۆن دەکات تاوەکو بەگوێرەی ڕێنمایی بەردەست شوێنیان بە کاندیدی دیکە پڕ بکاتەوە."

 

ئەوەی پێشبینی دەکرێت: بەگوێرەی یاسای هەڵبژاردن، کۆمیسیۆنی هەڵبژاردنەکان بە گوێرەی ڕیزبەند بەکاندیدێکی هەمان لیست پڕ دەکرێتەوە ئەگەر هیچیان ئامادەنەبوون، پەنا بۆ پەیڕەوکردنی سیستەمیی "باقی ئەقوا" دەبرێت، ئەو کاندیدەی لە هەمان بازنە زۆرترین دەنگی هەیە و کورسی بەدەستنەهێناوە شوێنی پڕدەکاتەوە، بەو مەرجەی لە لیستێکی براوەی هەڵبژاردن بێت.

 

زانیاریی زیاتر: لە دانیشتنی ئەمڕۆی پەرلەماندا کۆمەڵی دادگەری کە سێ کورسی هەیە و لاهوور شێخ جەنگی، کاندیدی دەرچووی بەرەی گەل لە سلێمانی بەشداری ناکەن و سوێندی یاسایی ناخۆن.

 

ئەوەی پێویستە بیزانیت: بەشدارینەکردنی کۆمەڵی دادگەری لە دانیشتن و سوێند نەخواردنی پەرلەمانتارانی ئەگەری دابەشبوونی کورسییەکانی بەسەر لایەنەکاندا زیاتر دەکات، ئەگەر لە ماوەی یاسایی دیاریکراودا پێداگرییان لەسەر بەشدارینەکردن کرد.