کۆمەڵی دادگەری پەرلەمانتارێکی لە ڕیزەکانی دوورخستەوە

ئاڤا نیوز

 

ئەمڕۆ یەکەمین کۆبوونەوەی خولی شەشەمی پەرلەمانی کوردستان بەڕێوەدەچێت، ئەندامی ئەنجوومەنی باڵای کۆمەڵی دادگەریش دەڵێت، 'سوورین لەسەر بڕیارەکەمان و ناچینە پەرلەمان'.

وێنە گەورەکە: بڕیار بوو کاتژمێر 11:00ی پێشنیوەڕۆی ئەمڕۆ دووشەممە، یەکەمین کۆبوونەوەی خولی شەشەمی پەرلەمانی کوردستان بەڕێوەبچێت، بەڵام هێشتا کۆبوونەوەکە دەستی پێنەکردووە، سەرجەم لایە براوەکانی هەڵبژاردن جگە لە کۆمەڵی دادگەری بەشداری کۆبوونەوەکە دەکەن.

 

لێدوانی فەرمی: شوان ڕابەر، ئەندامی ئەنجوومەنی باڵای کۆمەڵی دادگەری کوردستان بە ئاڤا نیوزی ڕاگەیاند: سەرکردایەتی کۆمەڵی دادگەری لەسەر بڕیاری بەشداری نەکردنی لە خولی شەشەمی پەرلەمانی کوردستان سوورە، بۆیە ئەمڕۆش بەشداری یەکەمین کۆبوونەوە ناکەین، "هەر کەسێک بەشداری کۆبوونەوەکە بکات، وەکو ئەندامی کۆمەڵی دادگەری بەشدار نابێت و ئەمەش سیاسەت و بۆچوونی کۆمەڵی دادگەری نییە".

 

زانیاریی زیاتر: هێرۆ عەتار، کاندیدی دەرچووی کۆمەڵی دادگەری لە بازنەی سلێمانی بایکۆتی حیزبەی شکاند و چووە نێو هۆڵی پەرلەمان، بڕیارە سوێندی یاسایی بخوات.

 

لەلایەکی دیکەوە: لە ڕاگەیێنراوێکدا کۆمەڵی دادگەری ڕایگەیاند: بڕیارماندا بە دوورخستنەوەی هێرۆ عەتار لە ڕیزەکانمان، بەهۆی بەشداریکردنی لە کۆبوونەوەی خولی شەشەمی پەرلەمانی کوردستان. 

ئەوەی پێویستە بیزانیت: ڕۆژی 26-10-2024، سەرکردایەتی کۆمەڵی دادگەر بڕیاریدا بەشداری خولی شەشەمی پەرلەمانی کوردستان نەکات.