شاخەوان عەبدوڵڵا: پڕۆژە یاسای گەڕاندنەوەی خاوەندارێتیی موڵك و ماڵ تەنیا دەنگدانی كۆتایی ماوە

ئاڤا نیوز

 

دوێنێ پەرلەمانی عێراق كۆبووەوە و لەمیانەدا بڕگەكانی پڕۆژە یاسای گەڕاندنەوەی خاوەندارێتیی موڵك و ماڵی داگیركراو دەنگیان لەسەرە درا و جێگری سەرۆكی پەرلەمانی عێراقیش دەڵێت، "تەنیا دەنگدانی كۆتایی ماوە".

 

لێدوانی فەرمی: شاخەوان عەبدوڵڵا، جێگری سەرۆكی پەرلەمانی عێراق لە كۆنفڕانسێكی ڕۆژنامەوانیدا ڕایگەیاند: "دوێنێ سەرجەم بڕگەكانی پڕۆژە یاسای گەڕاندنەوەی خاوەندارێتیی موڵک و ماڵی داگیركراو دەنگیان لەسەر درا، ئەوەی ماوەتەوە تەنیا ئەوەیە كە لە دانیشتنی داهاتوو كۆی پڕۆژەكە بخرێتە دەنگدانەوە، توانیمان خانەقین و مەندەلیش لەنێو پڕۆژە یاساكەدا جێبكەینەوە".

 

ئەوەی پێویستە بیزانیت: ئێستا سێ پڕۆژە یاسا كە هی كورد و سوننە و شیعەیە لە پەرلەمانن ڕێككەوتنی هەرسێ لایەن ئەوەیە كە هەرسێ پڕۆژەكە دەنگی لەسەر بدرێت، پرۆژەیاسای هەمواری یاسای باری کەسی، شیعە داوای پەسەندکردنی دەکات، پرۆژە یاسای گەڕاندنەوەی خاوەندارێتیی موڵک و ماڵی داگیرکراو بە فەرمانی ئەنجوومەنی ناسراو بە "قیادەی سەورە"ــی هەڵوەشاوە، کورد داوای پەسەندکردنی دەکات، هاوكات هەموارکردنەوەی یاسای لێبووردنی گشتیی ژمارە 27ی ساڵی 2016ـە، سوننە داوای پەسەندکردنی دەکات.

 

لەلایەكی دیكەوە: شاخەوان عەبدوڵڵا ڕاشیگەیاند: گومان هەیە كە ئەگەر پڕۆژە هەمواری یاسای باری كەسی دەنگی لەسەر بدرێت پەرلەمانتارە شیعەكان لە هۆڵی پەرلەمان بچنە دەرەوە، بۆیە ئێمە پێمانوایە دەبێت هەرسێ پڕۆژەكە بە یەك پاكێج دەنگیان لەسەر بدرێت، بۆ ئەوەی هیچ لایەنێك نەتوانێت فێڵ لە لایەنەكەی دیكە بكات.