مونا قەهوەچی داوای پۆستی وەزیری ڕۆشنبیری دەکات

ئاڤا نیوز

 

مونا قەهوەچی، پەرلەمانتاری پێکهاتەی تورکمان لە بازنەی هەولێر لە پەرلەمانی کوردستان دەکشێتەوە و پۆستێکی حوکمی لە کابینەی دەیەم وەردەگرێت، هاوکات لە شوێنی ئەو کاندیدێکی سەربەخۆی تورکمان دەبێتە پەرلەمانتار.

 

وێنە گەورەکە: پێکهاتەکان کە پێنج کورسییان لە پەرلەمانی کوردستان هەیە، ڕایانگەیاندووە بەشداری لە پێکهێنانی حکومەتی نوێ دەکەن، پێشتریش داوایان کردبوو لە دابەشكردنی پۆستەکاندا بەپێی ژمارەی کورسییەکانیان مامەڵەیان لەگەڵ نەکرێت، بەڵکو وەک نەتەوەی دووەمی هەرێمی کوردستان پۆستییان پێبدرێت.

 

ئەوەی پێویستە بیزانیت: مونا قەهوەچی لە خولی ڕابردووی پەرلەمانی کوردستان سکرتێری پەرلەمان بوو، لە هەڵبژاردنی خولی شەشەمی پەرلەمانی کوردستانیشدا 3 هەزار و 666 دەنگی بەدەستهێنا و کورسییەکی کۆتای پێکهاتەی تورکمانی لە بازنەی هەولێر مسۆگەرکرد، ڕۆژی دووشەممەش لە یەکەم دانیشتنی خولی شەشەمی پەرلەماندا سوێندی یاسایی خوارد، بەگوێرەی زانیارییەکان لە پەرلەمان دەکشێتەوە بۆ ئەوەی پۆستێکی حوکمی پێبدرێت.

 

لێدوانی فەرمی: مونا قەهوەچی، جێگری سەرۆکی پارتی چاکسازی تورکمان و پەرلەمانتاری پێکهاتەی تورکمان بە ئاڤای ڕاگەیاند، "لە پەرلەمان دەکشێمەوە و داوای وەرگرتنی پۆستی وەزارەتێکم کردووە بە دیاریکراویش پۆستی وەزیری ڕۆشنبیری."

 

ئەوەی پێشبینی دەکرێت: بەکشانەوەی مونا قەهوەچی لە پەرلەمان، سۆران سەڵاحەدین شوکور، کاندیدی سەربەخۆی پێکهاتەی تورکمان لە بازنەی هەولێر کە بە 450 دەنگ لە ڕیزبەندی دووەم دێت، شوێنی دەگرێتەوە و دەبێتە پەرلەمانتار.

 

ئەوەی پێشبینی دەکرێت: ئاڤا زانیویەتی پۆستی سکرتێری پەرلەمان بۆ پێکهاتەکان دەبێت، کە دوو پەرلەمانتاری پێکهاتەی تورکمان و کریستیان کاندیدن بۆ وەرگرتنی ئەو پۆستە، ئەوانیش ڕامی نووری پەرلەمانتاری کریستیان لە هەولێر و نەجدەت نووری نوێنەری تورکمان لە سلێمانی. هاوکات ئەگەر زۆرە پۆستی وەزیری هەرێم بۆ کاروباری پێکهاتەکان بدرێت بە مونا قەهوەچی.