سوودانی لەبارەی نەوتی کوردستان داوایەک ئاراستەی پەرلەمانتاران دەکات

ئاڤا نیوز

 

زانیاریی تایبەت: لە کۆبوونەوەی ئەمڕۆی پەرلەمانی عێراق، سەرۆکوەزیران محەممەد شیاع سوودانی لەبارەی هەموارکردنەوەی یاسای بودجەی عێراق کە تایبەتە بە هەناردەکردنەوەی نەوتی هەرێمی کوردستان ڕوونکردنەوەی داوە، وتوویەتی حکومەتی عێراق زیانێکی زۆری کردووە و دەبێت چارەسەر بکرێت، بۆیە داوای لە پەرلەمانتاران کردووە دەنگ بە هەموارەکە بدەن و تێبپەڕێنرێت.

 

گۆشەیەکی دیکە: سوودانی لەبارەی دۆخی ئەمنی ناوچەکە و دوایین پەرەسەندنەکان قسەی کردووە و ڕوونکردنەوەی داوە حکومەت چ ڕێوشوێنێکی گرتووەتەوە بەر، بەتایبەت بۆ هەڕەشەکانی ئیسرائیل، تێوەنەگلان لە شەڕی سووریا و زیادبوونی جموجۆڵی داعش، دواتر داوای لە پەرلەمانتاران کردووە ئەم بابەتە بە نهێنی بمێنێتەوە و هیچ شتێک ئاشکرا نەکرێت، تەواوی پەرلەمانتارانیش دەنگیان لەسەر داوە.

 

ئەوەی ئێستا ڕوودەدات: ئێستا دەرگای پرسیارکردن لە سوودانی کراوەتەوە، پەرلەمانتارانی کورد لەبارەی مووچەی مووچەخۆرانی هەرێمی کوردستان پرسیار ئاراستەی سوودانی دەکەن.

ئەوەی پێویستە بیزانیت: بەمەبەستی دەستپێکردنەوەی هەناردەی نەوتی کوردستان، ئەمڕۆ پەرلەمانی عێراق خوێندنەوەی دووەم بۆ هەمواری یاسای بودجە دەکات. لە یاسای بودجە کە بۆ سێ ساڵ (2023- 2024-2025) دەرکراوە، واتە ساڵی داهاتووش کاری پێدەکرێت، دوو بڕگە هەموار دەکرێنەوە و هەردووکیان پەیوەندییان بە هەنگاوەكانی دەسپێكردنەوەی هەناردەی نەوتی هەرێمی كوردستانەوە هەیە.

زیاتر لە ساڵێک و هەشت مانگە نەوتی کوردستان وەستاوە و عێراق زیاتر لە 20 ملیار دۆلار زیانی بەرکەوتووە. بڕگەیەکیان پەیوەستە بە تێچووی بەرهەمهێنان و گواستنەوەی نەوت و لە شەش دۆلارەوە دەكرێت بە 16 دۆلار، کە کێشەی سەرەکی نێوان کۆمپانیاکان و حکومەتە و یەکێک لە ڕێگرییەکانی بەردەم پرۆسەکەیە.

نوێ دەکرێتەوە...