گوتەبێژی پارتی: لە داهاتوودا لەبارەی مووچە هەنگاوی جدیمان دەبێت

ئاڤا نیوز

 

گوتەبێژی پارتی دیموکراتی کوردستان ڕایدەگەیێنێت، وەک پارتی سەبارەت بە مووچەی فەرمانبەرانی هەرێمی کوردستان لە داهاتوودا هەنگاوی جدیمان دەبێت.

 

ڕاگەیێنراوی فەرمی: مەحموود محەممەد، گوتەبێژی پارتی دیموکراتی کوردستان ڕایگەیاند: ئێستا سیاسەتی برسیکردن بەرامبەر مووچەخۆرانی هەرێمی كوردستان پەیڕەودەکرێت لەلایەن چەند لایەنێکی بەشدار لە چوارچێوەی هەماهەنگیی لەنێو حکومەتی عێڕاق؛ لەپێناو بەدەستهاتنی مافی مووچەخۆران، پارتی لەداهاتوودا هەنگاوی جدیتری دەبێت. 

 

ئەوەی پێویستە بیزانیت: ئاڤا زانیویەتی چارەسەرکردنی کێشەی سێ مووچەی کۆتایی ئەمساڵ لە نێوان هەرێمی کوردستان و حکومەتی  عێراق گەیشتووەتە بنبەست، چاوەڕێ دەکرێت سەرۆکوەزیران مەسرور بارزانی و محەممەد شیاع سوودانیش بە تەلەفۆن ئەم بابەتە تاوتوێ بکەن و چارەسەرێک بدۆزرێتەوە.

 

زانیاریی زیاتر: بەپێی زانیارییەکانی ئاڤا، محەممەد شیاع سوودانی، سەرۆکوەزیرانی عێراق پێیوایە ئەم سێ مانگە تەنیا ئەتوانن بۆ هەر مانگێک بڕی 761 ملیار دینار بنێرن بۆ مووچەخۆرانی هەرێمی کوردستان، واتە ئەو کورتهێنانەی دروست دەبێت کە مانگانە قەبارەکەی 235 ملیار دینارە، نانێرێت.