دهۆک.. لێکۆڵینەوە لە گیان لە دەستدانی گەنجەکەی تەلەعفەر دەکرێت

ئاڤا نیوز

تەندروستی دهۆک گیانلەدەستدانی گەنجەکەی نەخۆشخانەی ئازادی پشتڕاست دەکاتەوە و دەلێت: لێکۆلینەوە لە ڕووداوەکە دەکەین.

 

چیرۆکی سەرەکی: دوای نیوەڕۆی ئەمڕۆ چوارشەممە 4-12-2024، لە نەخۆشخانەی حکومی ئازادی نەشتەرگەرییەک بۆ گەنجێکی تەمەن 22 ساڵان دەکرێت، دوای نەشتەرگەرییەکە گەنجەکە بەهۆش خۆی نایێتەوە و گیانلەدەست دەدات.

لێدوانی فەرمی: د. سەگڤان سلێمان، بەڕێوەبەری نەخۆشخانەی ئازادی لە دهۆک بە ئاڤا نیوزی ڕاگەیاند: گەنجەکە بەسەرکەوتوویی و بێ کێشە نەشتەرگەریی شەویلگەی بۆ کراوە، بەڵام دوای نەشتەرگەرییەکە، گەنجەکە کۆمەڵێک لێکەوتەی خراپی لێ دەردەکەوێت و بەهۆیەوە تەندروستی تێکدەچێت و گیانلەدەست دەدات.

بەڕێوەبەری نەخۆشخانەی ئازادی ئەوەشی گوت: سبەی پێنجشەممە 5-12-2024، لیژنەیەکی لێکۆلینەوە، لە هۆکاری ڕووداوەکە پێکدەهێنرێت و دواتر ئەنجامەکەی بۆ ڕای گشتی بڵادەکرێتەوە، لە هەبوونی هەر هەڵەیەکیش لە نەشتەرگەرییەکە، یاسا کاری خۆی دەکات.

باکگراوند: نەشتەرگەریی شەویلگەکان جۆرێکی نەشتەرگەرییە تێیدا ناڕێکییە ئێسکییەکانی شەویلگە و ددانەکان ڕێکدەکرێنەوە، ئەمەش بۆ ئاسانکردنی ئەو کردارانەی کە ددان و شەویلگەکان لێی بەرپرسن، بەرێوەچوونی جووڵەکانیان بەشێوەیەکی باشتر و بەخشینی شێوازێکی جوانتر بە دەمووچاوی چارەخوازەکە.