لیژنەیەکی باڵا  بۆ هاوتاکردنی مووچەی خاوەن پێداویستییەکان پێکدەهێنرێت

ئاڤا نیوز 

 

لە کۆبوونەوەی نێوانیاندا هەردوو وەزیری کاروباری کۆمەڵایەتیی هەرێمی کوردستان و عێراق ڕێککەوتوون لەسەر ئەوەی لیژنەیەکی باڵا بەسەرپەرشتیی خۆیان پێکبهێنرێت بۆ گەیشتن بە چارەسەری کۆتایی بۆ هاوتاکردنی مووچەی خاوەن پێداویستییە تایبەتەکان و سەرجەم پرسەکانی دیکە.

 

وێنە گەورەکە: شاندێکی باڵا  بە سەرپەرشتیی کوێستان محەممەد، وەزیری کار و کاروباری کۆمەڵایەتی لە بەغدا بوون و لەگەڵ وەزیرانی داد و کاروباری کۆمەڵایەتی عێراق کۆبوونەوە و بە مەبەستی دۆزینەوەی چارەسەر بۆ چەند گرفتێکی هەڵواسراوی پەیوەست بە چاودرێریی خێزان و چاکسازیی کۆمەڵایەتیی.

 

لێدوانی فەرمی: یوسف چاوشین، ئەندامی شاندەکە بە ئاڤای گوت، "بەڕوونی سەرجەم کێشەکانی خاوەن پێداویستییە تایبەتەکان، هاوکاریی چاودێریی کۆمەڵایەتی و دابینکردنی سەبەتە خۆراکی مانگانە ئاراستەی ئەحمەد ئەسەدی، وەزیری کاروباری کۆمەڵایەتیی عێراق کراوە، بەڵێنی داوە بەڕژدی کار لەسەر چارەسەریان بکات".

 

خاڵی ئەرێنی: لە کۆبوونەوەی نێوان وەزیرانی کار و کاروباری کۆمەڵایەتی هەرێمی کوردستان و عێراق لێکتێگەیشتننی ئەرێنی بۆ چارەسەری کێشەکان بەدیکراوە و ڕێککەوتوون لەسەر پێکهێنانی لیژنەیەکی باڵا بۆ گەیشتن بە چارەسەری کۆتایی.

 

ژمارەکان وادەڵێن: ناوی 13 هەزار و 200 خاوەن پێداویستی تایبەت ڕەوانەی وەزارەتی دارایی عێراق کراوە، لەپاڵ ئەوەش لیژنە باڵاکە کار لەسەر هاوتاکردنی ئەو ناوانە و ئەوانەش دەکات کە ئێستا 100 بۆ 150 هەزار مووچەیانە، تێکڕا ژمارەیان دەبێتە 102 هەزار کەس.

 

زانیاریی زیاتر: بڕیارە لە ئایندەیەکی نزیک لیژنەکە دەست بە کارەکانی بکات، بۆ ئەوەی  ماف و شایستەییەکانی خاوەن پێداویستی و خێزانە کەمدەرامەتەکان هاوتای عێراق بکرێت.