لە 12 ڕۆژدا لە سووریا چی ڕوویدا؟

ئاڤا نیوز

 

کاتژمێر 04:19 خولەکی بەرەبەیانی ڕۆژی یەکشەممە 8-12-2024، هەواڵی کەوتنی دیمەشق و ڕووخانی ئەسەد بڵاوکرایەوە، ئەم هەواڵە ساڵەهای ساڵە ملیۆنان سووری چاوەڕێیان دەکرد.

 

چیڕۆکی سەرەکی: شەڕ و پێکدادانەکانی سووریا لە حەلەبەوە لەلایەن گرووپە چەکدارەکانی ئۆپۆزیسیۆن دەستیان پێکرد و بە 12 ڕۆژ لە دیمەشق بە ڕووخانی دەسەڵاتی ئەسەد کۆتایی پێهات کە شار بە شار و ناوچە بە ناوچەیان لە سوپای سووریا پاککردەوە.

 

هاوپەیمانەکانی سووریا فریای ئەسەد نەکەوتن:

دوای 13 ساڵ پشتیوانی و هاوکارییەکان بۆ ئەسەد، دواجار نە ئێران، نە عێراق، نە حیزبوڵلا و نە ڕووسیاش فریای ئەسەد نەکەوتن و تەسلیمی قەدەریان کرد.

ئەوەی پێویستە بیزانیت: کەوتنی ڕژێمەکەی ئەسەد دوای زیاتر لە 50 ساڵ حوکمڕانی بووە مانشێتی هەموو میدیاکانی جیهان. یەکەم میدیاش تەلەفزیۆنی فەرمی سووریا بوو کە گرووپە چەکدارەکان هەواڵی کەوتنی پایتەخت و هەڵاتنی بەشار ئەسەدیان بڵاوکردەوە.

 

لێدوانی فەرمی: محەممەد جۆلانی، سەرۆکی دەستەی تەحریرولشام لەگەڵ چوونە نێو دیمەشقی پایتەخت ڕایگەیاند:

- نزیکبوونەوە لە دامودەزگا حکومییەکان قەدەغەیە.

- تەواوی دامودەزگاکان لە ژێر سەرکردایەتی سەرۆکوەزیرانی سووریادا دەمێنێتەوە، تاوەکو ڕادەستکردنی دەسەڵات ئەنجام دەدرێت.

- سەردەمێکی نوێ لە سووریا دەستپێدەکات، سەردەمێک کە هەموو کەسێک ئازاد و یەکسانە تیایدا.

 

- لەگەڵ ئەبومحەممەد جۆلانی، سەرکردەی دەستەی تەحریرولشام گفتوگۆ کراوە تا پڕۆسەی ڕادەستکردنی دەسەڵات خێراتر بکرێت.

 

ئەمەش بزانە: دوای پەیامەکەی سەرۆکوەزیرانی سووریا، گرووپە چەکدارەکان دەستیان کرد بە شکاندنی دەرگای زیندانەکان، خەڵک ڕژانە سەرشەقام بۆ ئاهەنگێڕان، کاردانەوەکان زۆر بوون و ئەسەدیش هەڵات.