ئاڤا نیوز هۆکاری دواکەوتنی هەناردەی نەوتی کوردستان ئاشکرا دەکات

ئاڤا نیوز

یازدە مانگ بەسەر ڕاگرتنی هەناردەی نەوتی هەرێمی کوردستان تێپەڕبووە، هێشتا هیچ ڕێککەوتنێک لە نێوان عێراق و تورکیا نەکراوە بۆ دەستپێکردنەوەی. وەزیری نەوتی عێراق دەڵێت، لێکتێگەیشتنی باشیان لەگەڵ هەرێمی کوردستان هەیە.
 
پێشهات و چاوەڕوانییەکان: ڕۆژی دووشەممە 26-2-2024، حەیان عەبدولغەنی، وەزیری نەوتی عێراق و لیژنەی نەوت و گاز لە ئەنجوومەنی نوێنەرانی عێرق کۆبوونەوە. هەناردەکردنەوەی نەوتی هەرێمی کوردستان پرسی سەرەکی کۆبوونەوەکە بوو. بڕیارە هەفتەی داهاتووش کۆبوونەوەیەکی دیکە بکرێت و پێشهاتی نوێ سەبارەت بەو پرسە ئاشکرا دەبن.

هۆکارە زانراوەکان: نەهرۆ ڕواندزی، ئەندامی لیژنەی نەوت و گاز لە ئەنجوومەنی نوێنەرانی عێراق بە ئاڤا نیوزی گوت: "دواکەوتنی هەمواری یاسای بودجەی ساڵی 2024، هۆکارێکە بۆ دەستپێنەکردنەوەی هەناردەی نەوتی هەرێمی کوردستان". دەشڵێت "بابەتی دووەم سیاسییە و پەیوەندیی بە ڕێکنەکەوتنی نێوان عێراق و تورکیاوە هەیە".
 
بۆچی گرنگە: ڕۆژى 25ى ئازارى 2023 هەناردەى نەوتى هەرێمى کوردستان بە بڕیارى دادگەى ناوبژیوانیی پاریس ڕاگیرا. لەو کاتەوە لەپاڵ گوشارەکانی بەغدا لە پێنەدانی شایستە داراییەکانی هەرێمی کوردستان، ڕاگرتنی هەناردەی نەوتیش گوشارێکی دیکەی ئابوورییە لەسەر هەرێمی کوردستان.

کاریگەری و لێکەوتەکان: ڕاگرتنی هەناردەی نەوتی هەرێمی کوردستان لە ڕێگەی بەندەری جەیهانی تورکیا  10 تا 12 ملیار دۆلار زیانی بە بودجەی عێراق گەیاندووە. ماوەیەک لەمەوبەریش وەزیری وزەی تورکیا دووپاتی کردەوە کە بۆری نەوتی هەرێمی کوردستان ئامادەیە و هیچ کێشەیەکی تەکنیکی نەماوە.

لە لایەکی دیکەوە: مایڵز کاگینز، گوتەبێژی کۆمەڵەی پیشەسازیی نەوتی کوردستان (ئەپیکور) ڕۆژی 30-01-2024، بە ئاڤا نیوزی گوت "نامەیەکی تایبەتمان بۆ کۆنگرێسی ئەمریکا ناردووە. داوامان کرد ئەمریکا گوشار بخاتە سەر حکومەتی عێراق بۆ هەناردەکردنەوەی نەوتی کوردستان".