مەسرور بارزانی پشتیوانیی حكومەت بۆ بەرهەم ساڵح لە پۆستە نوێیەكەی دووپات دەكاتەوە

ئاڤا نیوز

سەرۆکوەزیران مەسرور بارزانی پەیامێکی پیرۆزبایی ئاراستەی د. بەرهەم ساڵح دەكات، بە بۆنەی وەرگرتنی پۆستێکی باڵا نەتەوە یەکگرتووەکان بۆ کاروباری پەنابەران. 

چیرۆکی سەرەکی: ئەمڕۆ هەینی، سەرۆکوەزیران مەسرور بارزانی، پەیامێکی بڵاوكردەوە و تیایدا پیرۆزبایی ئاراستەی د. بەرهەم ساڵح دەكات بەبۆنەی دەستبەکاربوونی وەک کۆمیسیاری باڵای نەتەوە یەکگرتووەکان بۆ کاروباری پەنابەران (UNHCR).

ڕاگەیێنراوی فەرمی: ماڵپەڕی حکومەتی هەرێمی کوردستان، پەیامەكەی سەرۆكوەزیران مەسرور بارزانی بڵاو كردووەتەوە و تیایدا هاتووە: بە بۆنەی وەرگرتنی پۆستی کۆمیسیاری باڵای نەتەوە یەکگرتووەکان بۆ کاروباری پەنابەران، گەرمترین پیرۆزباییتان ئاراستە دەکەم و هیوای سەرکەوتنتان بۆ دەخوازم.

- مایەی خۆشحاڵیمانە کەسایەتییەکی کورد، ئەم پۆستە باڵایەی نەتەوە یەکگرتووەکان وەربگرێت، کە دڵنیاین بەڕێزتان، سەرکەوتووانە ئەم ئەرکە بەجێ دەگەیەنین.

زانیاریی زیاتر: سەرۆكوەزیران مەسرور بارزانی لە پەیامەكەیدا پشتیوانیی حكومەت بۆ بەرهەم  ساڵح دووپات دەكاتەوە بۆ سەركەوتنی لە ئەركە نوێیەكەی.

بۆچی گرنگە: ئەمە وەرچەرخانێکی دیپلۆماسییە؛ بۆ یەکەمجارە کەسایەتییەکی سیاسیی کورد پۆستێکی لەم ئاستە باڵایە لە ناو دامەزراوە سەرەکییەکانی نەتەوە یەکگرتووەکاندا وەربگرێت.

ئەوەی لەبارەیەوە دەگوترێت:  وەرگرتنی ئەم پۆستە لەلایەن د. بەرهەم ساڵحەوە، دەرفەتێکی نوێیە بۆ نیشاندانی توانای كەسایەتیی کورد لەسەر ئاستی جیهانی، بەتایبەت لە دۆسیە مرۆییەکاندا.