ڕێککەوتنی هەولێر و بەغدا لەسەر پرسی مووچە کۆتایی ئەم مانگە تەواو دەبێت

ئاڤا نیوز

ڕێككەوتنی نێوان هەولێر و بەغدا بۆ هەناردەكردنی نەوتی کوردستان و ناردنی 120 ملیارەکەی داهاتی ناوخۆ تا کۆتایی ئەمساڵە، 31ـی ئەم مانگە ڕێککەوتنەکە تەواو دەبێت. دوای ئەوە هەولێر و بەغدا دوو بژاردەیان لەبەردەستە.

وێنە گەورەکە: سەرەڕای ڕێککەوتنی نێوان هەولێر و بەغدا لەبارەی هەناردەکردنەوەی نەوتی کوردستان و داهاتی ناوخۆ، هێشتا کێشەی پرسی مووچە بە تەواوی چارەسەر نەبووە، کۆتایی ئەم مانگە ڕێککەوتنەکە کۆتایی دێت.

شێوازی جێبەجێکردن: هەولێر و بەغدا یان دەبێت ڕێککەوتنەکە لەدوای ناردنی ئەم مووچەیە نوێ بکەنەوە، یان دەبێت هەر کار بەو ڕێککەوتنە بکەن تا بودجەی ساڵی 2026 ئامادە و پەسەند دەکرێت، ئەمەش دەکەوێتە دوای کاراکردنەوەی پەرلەمان و پێکهێنانی کابینەی نوێی حکومەتی عێراق، بەدڵنیاییەوە ئەمەش چەند مانگێکی دەوێت.

لێدوانی فەرمی: بەرپرسێکی باڵای کوردستان بە ئاڤای وت، کێشەمان لەسەر ڕێککەوتنەکە نییە، تەنیا دەمانەوێت 120 ملیارەکە کەم بکرێتەوە و بەفەرمیش نووسراومان بۆ بەغدا کردووە کە ناتوانین هەموو مانگێک 120 ملیار بنێرین و زۆرە.

چی ڕوویدا: ناوەڕاستی ئەم هەفتەیە محەممەد شیاع سوودانی، سەرۆکوەزیرانی عێراق بڕیاری دا لەسەر بنەمای ڕاپۆرتی ئەنجوومەنی دەوڵەت پێداچوونەوە بە 120 ملیارەکە بکرێت و ئەنجوومەنی باڵای ئابووری بۆ ئەم کارە ڕاسپارد.

بەرپرسە باڵاکەی کوردستان لەمبارەیەوە وتی، ئەگەر بێت و 120 ملیارەکە کەم بکرێتەوە، ئەوا هیچ گرفتێک بۆ ناردنی مووچە لە بە‌غداوە دروست نابێت و کۆتایی هەموو مانگێک لەگەڵ مووچەی فەرمانبەرانی عێراق مووچە دەنێردرێت، ئەگەرنا دەبێت وەکو حکومەتی کوردستان خۆمان لەگەڵ دۆخەکە بگونجێنین.

لەلایەکی دیکەوە: بەرپرسێکی باڵای حکومەتی عێراق بە ئاڤای وت، کێشە بۆ ناردنی مووچەی خەڵکی کوردستان دروست نابێت، ئەگەر ڕێککەوتنێکی نوێش نەکرێت هەمان ڕێککەوتنی پێشوو جێبەجێ دەکرێت.