ئاڤا نیوز چیرۆکی ڕزگارکردنی ژنێکی ئێزیدی لە سووریا بڵاودەکاتەوە

ئاڤا نیوز 

 

دوای 10 ساڵ لە چاوەڕوانی دوازدەیەمین ئەندامی خێزانێکی ئێزیدی لە چەپۆکی خێزانێکی داعش ڕزگار دەکرێت و  بڕیارە لە چەند ڕۆژی داهاتوو باوەشی ئارامی بە کەسوکاری بکاتەوە و حەسرەتی غەریبی دووری ماوەیەکی درێژ بەبا بدات.

 

چیرۆکی سەرەکی:  لە ساڵ 2014، چەکدارانی داعش ‌هێرشیان کردە سەر شنگال و داگیری دەکەن، هەر بەوەش نەوەستان منداڵ، گەنج و پیر ڕاپێچ دەکەن، خێزانەکان لەیەک دەترازێنن و هەر ئەندامەی بە لایەکدا دەبەن، لەو کاتەدا  (س . خ) کە ژنێکی ئێزیدییە خۆی و 11 ئەندامی دیکەی خێزانەکەی کەوتنە  دەستی داعش، هەر 11 ئەندامەکەی دیکە بەچەند قۆناغێک لە دەستی داعش دەرهێنران و تەنیا چارەنووسی (س . خ) بە نادیاری مایەوە تا سێ ڕۆژ لەمەوبەر لەلایەن نووسینگەی ڕزگارکردنی ڕفێندراوانی دەستی داعش لەبەشی باکووری ڕۆژئاوای سووریا ڕزگار کرا.

 

وێنە گەورەکە: (س . خ) دوای دەستگیرکردنی دەگوازرێتەوە تەلەعفەر ماوەیەک لەوێ دەیهێڵنەوە دواتر بەرەو مووسڵ دەیبەن، لەوێشەوە بەرەو سووریای دەیگوازنەوە بەزۆرەملێ  لە ئەندامێکی داعش مارە دەکرێت و ماوەی 10 ساڵ لەگەڵی دەژیت و دوای ڕووخانی دەسەڵاتەکەی بەشار ئەسەد لەلایەن نووسینگەی ڕزگارکردنی ڕفێندراوانی دەستی داعش ئازادکرا.

 

لێدوانی فەرمی: حسێن قائیدی، بەرپرسی نووسینگەی ڕزگارکردنی ڕفێندراوانی دەستی داعش بەئاڤا نیوزی گوت، "ئەو ژنە ئێزیدییە لە سووریایە و  شوێنی پارێزراوە و دوای تەواوکردنی ڕێککارە یاساییەکان لە دیوی سووریا، دەگەڕێنرێتەوە هەرێمی کوردستان، کە چەند ڕۆژێکی کەم دەخایەنێت."

 

جەختی لەوەشکردەوە  ئەم دۆخە بە دەرفەت دەزانن بۆ گەڕان و بەدواداچوون بەدوای ونبووانی ئێزیدی و گومان دەکەن هەزار ئەندامی دیکەی خانەوادەی ئێزیدییەکان لە سووریا بن و کار لەسەر شاد کردنەوەیان بەخێزانەکانیان دەکەن.

 

 ئەوەش بزانە: تاوەکو ئێستا سێ هەزار و 584 ڕفێنراوی ئێزیدی لە دەستی داعش ئازادکراون و دوو هەزار و 591 کەس ماون بە چارەنووسی نادیار.