زانیاریی نوێ لەبارەی دابەشکردنی شووقە بەسەر کرێنشینان

ئاڤا نیوز

 

وەزارەتی ئاوەدانکردنەوە و نیشتەجێکردن لەلایەک و دەستەی وەبەرهێنان لەلایەکی تر کار بۆ ئەوە دەکەن زیاتر لە 30 هەزار یەکەی نیشتەجێبوون بەسەر خێزانە کەمدەرامەتەکان و کرێنشینان دابەش بکەن، لەو 30 هەزار شووقەیە نۆ هەزار و چوار یەکەیان لەلایەن وەزارەتی ئاوەدانکردنەوە سەرپەرشتی دەکرێن.

 

وێنە گەورەکە: ساڵی 2021  وەزارەتی ئاوەدانکردنەوە و نیشتەجێکردن فۆرمی ئۆنڵاینی بۆ دابەشکردنی نۆ هەزار و چوار یەکە بەسەر کرێنشینان بڵاوکردەوە، بە قیستی درێژخایەن بەو کەسانە دەدرێت کە ناویان لە تیروپشکدا دەردەچێت.

زانیاریی بەدەستهاتوو: 68 هەزار کەس فۆرمیان پڕکردبووەوە، بەڵام  تەنیا فۆرمی 26 هەزار کەسیان دروست بوو و کۆدیان وەرگرتووە، واتە تەنیا ئەوانەی کۆدیان بۆ گەڕاوەتەوە ناویان دەچێتە تیروپشک. ئێستا ناوەکان بۆ هەرچوار پارێزگا و ئیدارە سەربەخۆکان گەڕێنراوەتەوە، لەڕێگەی لیژنەیەکی تایبەت وردبینی بۆ فۆرمەکان دەکرێت. 

 

لێدوانی فەرمی: زانا عەبدولعەزیز، بەڕێوەبەری گشتی کاروباری تەکنیکی لە وەزارەتی ئاوەدانکردنەوە و نیشتەجێکردن بە ئاڤای گوت، "کێشەکە نەبوونی بودجەیە، بۆیە بەشێکی پڕۆژەکان بە نیوەچڵی ماونەتەوە و ئێستا ئامادەنین بۆ دابەشکردن، بۆیە تیروپشک دەکەوێتە دوای ئەوەی تەواو دەکرێن." 

 

لەلایەکی دیکەوە: بەرگەشت ئاكرەیی،گوتەبێژی دەستەی وەبەرهێنان بە ئاڤای گوت: دوو پلانمان هەیە بۆ ئەوەی پڕۆژەكان دەستپێبكەن؛

 

یەكەم: داوامان كردووە وەبەرهێنەران پڕۆپۆزەڵ و دەرخستەمان بدەنێ بە كوالیتی بەرز و نرخی هەرزان بۆ ئەوەی  دەستبكرێت بە پڕۆژەكان.

دووەم: لە ڕێگەی حكومەتی هەرێمی كوردستان و حکومەتی عێراقەوە  هەوڵ بدرێت حیساب بانكییەك دروست بكرێت و پارەی بۆ دابینبكرێت بۆ ئەوەی دەست بكرێت بە پڕۆژەكان، وتیشی، لەگەڵ كابیینەی دەیەم و ساڵی نوێ ئیشەڵا دەستدەكەین بە پڕۆژەكان.

 

ئەوەش بزانە: شێوازی پێدانی قیستی شووقەکان بەپێی تێچووی شووقەکە دەبێت، واتا ئەگەر شووقەیەک سێ دەفتەر تێچووەکەی بێت، ئەو کەسەی وەری دەگرێت دەبێت لە ماوەی 25 ساڵ پارەکە بداتەوە، مانگانە دەکاتە 100دۆلار.