لە کۆبوونەوەی ئەنجوومەنی وەزیرانی عێراق چۆن باسی مووچە کراوە؟

ئاڤا نیوز

لە کۆبوونەوەی ئەنجوومەنی وەزیرانی عێراق باسی مووچە کراوە، بەڵام بڕیاری ناردنی تەواوکاری مووچەی سێ مانگی کۆتایی ئەمساڵ نەدراوە و بۆ سوودانی جێهێڵدراوە.

وێنە گەورەکە: ئەمڕۆ ئەنجوومەنی وەزیرانی عێراق کۆبووەوە و لەسەر داوای ئەنجوومەنی وەزیرانی هەرێمی کوردستان یەکێک لە تەوەرەکانی پرسی مووچەی خەڵکی کوردستان بوو.

زانیاریی تایبەت: تەیف سامی، وەزیری دارایی عێراق دۆسییەی تایبەت بە مووچەی مووچەخۆرانی هەرێمی کوردستانی بردووەتە کۆبوونەوەکە، بەڵام ئەنجامەکەی لە ئاسی خواستی هەرێمی کوردستان نەبووە، بۆیە پرسەکە بۆ محەممەد شیاع سوودانی، سەرۆکوەزیرانی عێراق جێهڵدراوە و چاوەڕوان دەکرێت لە چەند کاتژمێری داهاتوودا دەسەڵاتی خۆی بەکاربهێنێت بۆ بڕیاردان لەسەر ناردنی تەواوکاری مووچە. 

ئەوەی پێویستە بیزانیت: پێشتر حکومەتی عێراق بڕیاری دابوو بۆ مانگەکانی 10 و 11 و 12، بۆ هەر مانگێک تەنیا بڕی 761 ملیار دینار بنێرێت، لەسەر داوای هەرێمی کوردستانیش بڕی 430 ملیار دینار لە پشکی هەرێمی کوردستان لە بودجە بۆ پڕکردنەوەی کورتهێنانی مووچە موناقەلە کراوە و تەنیا ئەوە ماوە بخرێتە سەر هەژماری بانکی هەرێمی کوردستان، بۆیە تاوەکو ئێستا دەست بە دابەشکردنی مووچە نەکراوە.

باکگراوند: ئەنجوومەنی وەزیرانی هەرێمی کوردستان لە کۆبوونەوەی دوێنێیدا داوای کرد ئەنجوومەنی وەزیرانی عێراق لە کۆبوونەوەی ئەمڕۆیدا چارەسەری بنەڕەتی کورتهێنانی مووچەی مووچەخۆرانی هەرێمی کوردستان بۆ  سێ مانگەکەی کۆتایی ئەمساڵ بکات.