فوئاد حوسێن: پێشنیازێکمان لەبارەی داهاتووی سووریا پێشکەشکردووە

ئاڤا نیوز

 

وەزیری دەرەوەی عێراق ڕایدەگەیێنێت لە کۆبوونەوەکەی وەزیرانی دەرەوەی وڵاتانی عەرەبی لە ئوردن پێشنیازێکی گشتگیرییان بۆ نەخشەی کارکردن بۆ داهاتووی سووریا پێشکەشی وڵاتان کردووە. وەزیری دەرەوەی عێراق دەشڵێت، نایانەوێت، "نایانەوێت 'لیبیا'یەکی دیکە دروست ببێت".

 

وێنە گەورەکە: ڕۆژی شەممە 14-12-2024 وەزیرانی دەرەوەی وڵاتانی عەرەبی کە لیژنەی پەیوەندیی وەزاریی عەرەبی پێکدێنن لەگەڵ تورکیا و ئەمریکا لە شاری عەقەبەی ئوردن دەربارەی دۆخی سووریا کۆبوونەوە، وەزیری دەرەوەی عێراقیش بەشداربوو و دوای کۆبوونەوەکە هەر یەکە لە وەزیرانی دەرەوەی ئوردن، عێراق، تورکیا و میسر کۆنگرەیەکی ڕۆژنامەوانیی هاوبەشیان ئەنجامدا.

 

ڕاگەیێنراوی فەرمی: فوئاد حوسێن، وەزیری دەرەوەی عێراق لە کۆنگرە ڕۆژنامەوانییە هاوبەشەکەدا ڕایگەیاند: 

• کۆبوونەوەکە تایبەت بوو بەو وڵاتانەی کاریگەربوون و کاریگەرییان لەسەر دۆخی سووریا هەیە، دووپاتمان کردەوە کە نامانەوێت لیبیایەکی دیکە لە ناوچەکە دروست ببێت.
• دۆخی سووریا جێی بایەخی عێراقییەکانە، سەقامگیریی سیاسی ئاسایشی سووریا کاریگەریی لەسەر سەقامگیریی عێراق دەبێت، هەر بۆیەش پێشنیازێکی گشتگیرمان پێشکەشکرد کە پلانی کارکردن بۆ داهاتووی سوریا لەخۆدەگرێت.
•  کۆبوونەوەکە کارکردن لەپێناو سەقامگیریی سووریا و گەڕانەوەی پەنابەرەکانی دووپات کردەوە.

 

ئەوەی پێویستە بیزانیت: لیژنەی پەیوەندیی وەزاریی عەرەبی لە دوای کۆبوونەوەکە لە بەیاننامەیەکدا ڕایگەیاند: پشتیووانی لە پڕۆسەی ڕاگوزەریی ئاشتیانەی سووری - سووری دەکەین کە کۆکەرەوەی هەموو لایەنە سیاسی و کۆمەڵایەتییەکانی سووریا بێت. 

 

لەلایەکی دیکە: هاوکات لە بەیاننامەکەدا داوایان لە ئەمینداری گشتیی نەتەوەیەکگرتووەکان کرد، کار لەسەر دامەزراندنی نوێنەرایەتیی نەتەوەیەکگرتووەکان بکات بۆ هاوکاریکردنی گەلانی سووریا و پشتگیریکردنی  پرۆسەی ڕاگوزەری.