وەزارەتی پەروەردە لێکۆڵینەوە لە کەیسی سەرپەرشتیارانانی یەدەگ دەکات

ئاڤا نیوز 

 

یەدەگەکانی پلەی سەرپەرشتیاری سەر بە وەزارەتی پەروەردە لە ڕێگەی ئاڤاوە داوای بەدواداچوون بۆ کەیسەکانیان دەکەن، کە بڕیار بوو لە مانگی 11 بەشێکیان بە گوێرەی پێویستی پەروەردەی پارێزگاکان، بەڵام دانەنراون، وەزارەتی پەروەردەش دەڵێت، وەستانی پرۆسەکە پەیوەندی بە بۆشایی مامۆستای میلاک هەیە. 

 

چیرۆکی سەرەکی: سێ ساڵ پێش ئێستا سەدان مامۆستای پسپۆڕ بەمەبەستی بوون بە سەرپەرشتیار تاقیکردنەوەیان لە هەولێر کرد، بەشێکیان بە گوێرەی پێویستی بەسەر پەروەردەکانی پارێزگاکان دابەشکران، بەشێکیان مانەوە  کە ژمارەیان 209 کەسە کران بە یەدەگ بۆ ئەوەی ئەگەر بۆشاییەک دروستبوو پڕیکەنەوە.

 

ئەوەی پێویستە بیزانیت: ئیمتیازی سەرپەرشتیار لە بەڕێوەبەری قوتابخانە گەورەترە، پێشووتر ئەوانەی تاقیکردنەوەیان دەکرد دەبوایە 13 ساڵ خزمەتیان هەبێت، دواتر لەلایەن وەزارەتی پەروەردەوە بۆ 10 ساڵ کەمکرایەوە بۆ ئەوەی سەرپەرشتیاری گەنج لەنێو پرۆسەکەدا ڕۆلی خۆیان بەرجەستە بکەن، 25% دێتە سەر موخەسەساتەکانیان.

 

لێدوانی فەرمی: ڕۆژ ئەرگۆشی،  لە بەڕێوەبەرایەتی سەرپەرشتیاری و دڵنیایی جۆری وەزارەتی پەروەردە بە ئاڤای گوت، "دواکەوتنی پرۆسەکە پەیوەندی بە دروستبوونی بۆشایی لەمامۆستای میلاک لە ناوەندەکانی خوێندن هەیە، بەتایبەت ئەو ناوەندانەی دوورە دەستن و دەکەونە ناوچە سنوورییەکان."

 

ئەوەش بزانە: لەماوەی ساڵانی ڕابردوو بەشێک لە مامۆستایانی میلاک دوای 10 ساڵ خزمەت دابەش بوون بەسەر ڕاهێنەر، سەرپەرشتیار و سەرپەرشتیاری یەدەگ، بەمەش بۆشایی بەشە وانەی دروستکردووە. ئێستا بەشێک لە بەڕێوەبەرایەتی پەروەردەکان پێویستیان بە سەرپەرشتیار هەیە.