ئاڤا بەدواداچوون بۆ کێشەی کارەبا دەکات؛ ڕۆژانە شەش بۆ حەوت کاتژمێر کارەبای نیشتمانی هەیە

ئاڤا نیوز

لەسەر داواکاریی خەڵک کە ڕۆژانە لە زۆرێك لە شار و شارۆچكەكانەوە دەیان کەس پەیوەندی دەکەن و  گلەیی لە كەمیی كارەبای نیشتمانی دەکەن، ئاڤا بەدواداچوونی کرد و دەرکەوت لە شەو و ڕؤژێکدا تەنیا شەش بۆ ١٠ کاتژمێر کارەبا بە هاوبەشان دەدرێت.

وێنە گەورەکە: لەکاتێکدا خەریکە پێ دەنێینە ساڵی 2025، کەچی هێشتا خەڵکی کوردستان خەمی کارەبایانە و بەدرێژایی 33 ساڵی ڕابردوو، سەرەڕای ئەو هەموو بودجە و پارە زۆرەی هاتووەتە هەرێمی کوردستان، نەتوانراوە ئەم کێشەیە چارەسەر بکرێت، ئێستاش تاکە ئومێدی خەڵک پرۆژی ڕووناکییە کە بە بڕیاری مەسرور بارزانی، سەرۆکوەزیرانی هەرێمی کوردستان دەستیپێکردووە و کارەبا دەکرێتە 24 کاتژمێری، بڕیاریشە لە دوو ساڵدا پرۆژەکە سەرتاسەری کوردستان بگرێتەوە.

لێدوانە فەرمییەکان: ئاڤا لە وەزارەتی کارەبا و هەرسێ بەڕێوەبەرایەتیی دابەشکردنی کارەبای هەولێر و دهۆک و سلێمانی بەدواداچوونی بۆ کێشەکە کرد:

وەزارەتی کارەبا: ئومێد ئەحمەد، گوتەبێژی وەزارەتی کارەبای هەرێمی کوردستان بە ئاڤا نیوزی ڕاگەیاند، لە سەرەتای مانگی ڕابردووەوە تاوەکو 25ـی مانگی 11، نزیکەی 17 کاتژمێر كارەبا لە شەو و ڕۆژێکدا بە هاونیشتمانیان دراوە، بەڵام لەدوای هاتنی شەپۆلی سەرما و بەرزبوونەوەی نائاسایی خواست لەسەر کارەبا، پێدانی کارەبا لە شەو و ڕۆژێکدا بۆ نزیکەی 8 بۆ 10 کاتژمێر کەمبووەتەوە.

بەپێی بەدواداچوونی ئاڤا، ئێستا لە تەواوی هەرێمی کوردستان دوو هەزار و 510 مێگاوات کارەبا بۆ هاونیشتمانیان هەیە و 393 مێگاواتیش بۆ كارگەكان تەرخان كراوە. 

ئومێد ئەحمەد، دەڵێت، بەگشتی، کاتژمێرەکانی پێدانی کارەبا بۆ نیوەی کاتژمێرەکانی پێشوو دابەزیون، بەوپێیەی خواست لەسەر کارەبا زیاتر بووە و کارەبا وەک سەرچاوەیەکی سەرەکی گەرمکەرەوە بەکاردەهێنرێت.

دهۆک: ئەندازیار شاكر مەحموود، بەڕێوەبەری كارەبای دهۆك بە ئاڤای گوت، ڕۆژانە ٦ بۆ ٧ كاتژمێر كارەبا دەدەن بە هاونیشتمانیان.

سلێمانی: سیروان محەمەد، گوتەبێژی كارەبای سلێمانیش بۆ ئاڤا نیوز پشتڕاستی کردەوە، بە هەمانشێوەی دهۆك ئەوانیش ئێستا تەنیا دەتوانن 6 بۆ 7 كاتژمێر كارەبا بە هاونیشتمانیان دەدەن.

هەولێر: بەختیار قاسم، بەڕێوەبەری گشتیی كارەبای هەولێر وەڵامەكەی بۆ ئاڤا ئەوە بوو بە هەمانشێوەی دهۆك و سلێمانی لە هەولێر ڕۆژانە 6 بۆ 7 كاتژمێر كارەبای نیشتمانی بە هاونیشتمانیان دەدرێت.

چارەسەر: سەرچاوەیەكی باڵا لە وەزارەتی كارەبا بە ئاڤای ڕاگەیاند، تاوەكو مانگەكانی دوو و سێی ساڵی داهاتوو بەرهەمهێنانی كارەبا زیاتر دەبێت و نزیكەی 500 مێگاواتی دیكە كارەبای هەرێمی كوردستان زیاد دەكات، بەمەش بەشێك لەو گرفتەی ئێستا هەیە چارەسەر دەبێت و كارەبای زیاتر بە هاونیشتمانیان دەدرێت.