ئێران هۆشداری لە گواستنەوەی نائارامییەکانی سووریا بۆ عێراق دەدات

ئاڤا نیوز

 

سەرۆکی ئەنجوومەنی ستراتیژی پەیوەندییەکانی دەرەوەی ئێران، هۆشداری لەو نائارامییە دەدا کە لە سووریا هەیە. هاوکات هۆشداری لە گواستنەوەی ئەو نائارامییە بۆ عێراقیش دەدات.

 

وێنە گەورەکە: دوای ڕووخانی دەسەڵاتی بەشار ئەسەد لە سووریا، هەژموونی ئێران لەو وڵاتە کۆتاییهات، پێشتریش پێگەی حیزبوڵڵای لوبنان و حەماس بەهۆی هێرشەکانی ئیسرائیل و کوشتنی سەرکردە باڵاکانی ئەو دوو ڕێکخراوەی نزیک لە ئێران لە لوبنان و فەڵەستین لاوازببوو، ئەمەش گورزێکی گەورەی لە ئێران دا. 

 

لێدوانی فەرمی: کەمال خەرازی، سەرۆکی ئەنجوومەنی ستراتیژی پەیوەندییەکانی دەرەوەی ئێران ئاماژەی بە مەترسیی دابەشبوونی سووریا کرد بەهۆی بەرژەوەندییە دەرەکییەکانەوە و ڕایگەیاند "ئیسرائیل بۆشایی سووریا بۆ تێکدانی ژێرخانی ئەو وڵاتەو و پێشێلکردنی سەروەرییەکەی دەقۆزێتەوە.

 

بە گوتەی سەرۆکی ئەنجوومەنی ستراتیژی پەیوەندییەکانی دەرەوەی ئێران، وێرانکردنی سووریا وەک دەوڵەتێک کە پشتیوانی مقاوەمە بوو، بەشێک بوو لە ئەجێندای ئەمریکی و ئیسرائیلی.

 

لەلایەکی دیکەوە: عەلی خامنەیی، ڕێبەری باڵای ئێران دەڵێت ئیسرائیل و ئەمریکا "بەتەواوی هەڵەن" لەو تێڕوانینەی کە بەرەی مقاوەمە کە تاران پاڵپشتی دەکات بە ڕووخانی حوکمی بەشار ئەسەد لە سوریا کۆتایی هاتبێت.