لە سۆران یەکەی نیشتەجێبوون بۆ کەسوکاری شەهیدان دروست دەکرێت

 

ئاڤا نیوز 

 

 

لە سۆران ئامادەکارییەکان بۆ دروستکردنی یەکەی نیشتەجێبوون بۆ کەسوکاری شەهیدان و زیندانیانی سیاسی دەستیپێکردووە و ئەو خێزانانە دەگرێتەوە کە پێشتر لە وەرگرتنی یەکەی نیشتەجێبوون و زەوی سوودمەند نەبوون.

 

وێنە گەورەکە: بە بڕیاری سەرۆکوەزیران مەسرور بارزانی، سەدان یەکەی نیشتەجێبوون لە سەرجەم ناوچەکانی هەرێمی کوردستان بۆ کەسوکاری شەهیدان و زیندانیانی سیاسی دروست دەکرێت. دوای دابینکردنی زەوی لیژنەیەکی باڵای وەزارەتەکانی شارەوانی و شەهیدان سەردانی دەکەن و ڕێکارەکانی دروستکردنیان دەستپێدەکات.

 

لێدوانی فەرمی: کەریم کاوە، بەڕێوبەری گشتیی شەهیدان و ئەنفالکراوانی سۆران بە ئاڤای گوت، "ڕەزامەندی دابینکردنی زەویمان لە ئیدارەی سەربەخۆی سۆران وەرگرتووە و لە ئایندەیەکی نزیک قۆناغی پشکنین و وردبینی بۆ ئەوانە دەکرێت کە تاوەکو ئێستا سوودمەند نەبوون، بۆ ئەوەی بەگوێرەی پێویستی زەوی دابین بکرێت".

 

ئەمەش بزانە: ئەو یەکانە لەلایەن دەزگای خێرخوازی بارزانی و دەستەی وەبەرهێنان دروست دەکرێن، بەشێکیان لەسەر بودجەی حکومەتی هەرێمی کوردستان دەبێت، بەبێ بەرامبەر بەسەر کەسوکاری شەهیدان زیندانیانی سیاسی دابەش دەکرێن.

 

لەلایەکی دیکەوە: 144 یەکەی نیشتەجێبوون بەسەر کەسوکاری شەهیدانی شەڕی داعش لە سنوورەکە دابەشکراون، ئێستا بەشێک لە پێداویستییەکانی نێو ماڵیان بۆ دادەنرێت لە ساڵی نوێوە لە یەکەکان نیشتەجێ دەبن.