جووتیاران دوایین گوژمەی شایستە داراییەکانیان وەردەگرن

ئاڤا نیوز 

 

ڕێککارەکانی گواستنەوەی پارە لە لقی هەولێری بانکی ناوەندی بۆ بانکەکانی کوردستان تەواوبووە و دەست بە دابەشکردنی بە دابەشکردنی پارەی گەنمی جووتیاران کراوە.

 

وێنە گەورەکە: وەزارەتی بازرگانی عێراق بڕی 125ملیار و 852 ملیۆن و 997 هەزار دیناری وەک دوایین گوژمەی شایستە داراییەکانی وەرگرتنی گەنمی جووتیارانی هەرێمی کوردستان خستووەتە سەر هەژماری بانکیی هەرێمی کوردستان، خەرجکردنی دوایین گوژمەی پارەکە شەش مانگ دوای ڕادەستکردنی گەنم بە سایلۆکان دێت، لەکاتێکدا جووتیارانی پارێزگاکانی عێراق لەگەڵ ڕادەستکردنی گەنم پارەکەیان وەرگرتووە.

 

لێدوانی فەرمی: میران بەختیار، بەڕێوەبەری سایلۆی هەولێر بۆ ئاڤا ڕایگەیاند: ئەو جووتیارانەی تاوەکو 12ـی 07ـی ئەمساڵ گەنمەکانیان ڕادەستی سایلۆکان کردووە، دەتوانن پارەکەیان وەربگرن. 

 

لەلایەکی دیکەوە: نازم ئەترووشی، بەڕێوەبەری بەبازاڕکردنی گەنمی دهۆک بە ئاڤای گوت: پارەکە بۆ سەرجەم بانکەکان نێردراوە و ئەمڕۆ بەسەر جووتیاراندا دابەش دەکرێت. 

 

ژمارەکان وادەڵێن: 125ملیار و 852 ملیۆن و 997 هەزار دینار بەمشێوەیە بەسەر پارێزگاکاندا دابەش دەبێت
هەولێر: 44 ملیار و 43 ملیۆن و 43 هەزار دینار.
سلێمانی: 47 ملیار و 642 ملیۆن و 421 هەزار دینار.
دهۆک: 34 ملیار و 165 ملیۆن و 533 هەزار دینار.