کونسوڵی فەرەنسا بۆ ئاڤا نیوز: سەردانی ماکرۆن لەسەر داوای بەغدا دواخراوە

ئاڤا نیوز

سەردانی سەرۆکی فەرەنسا لەسەر داوای بەپرسانی بەغدا دواخراوە، بەڵام سەردانەکە هەر دەکرێت.

چیرۆکی سەرەکی: دوو هەفتە پێش ئێستا هەواڵی ئەوە بڵاوکرایەوە بەمزووانە ئیمانوێل ماکرۆن، سەرۆکی فەرەنسا بۆ هەماهەنگی کاری ڕاوێژکارە فەرەنسییەکان و ئەرکەکانیان لە پشتیوانیکردنی پێشمەرگە و هێزە عێراقییەکان، سەردانی عێراق و هەرێمی کوردستان دەکات.

 

لێدوانی فەرمی: یان برەم، کونسوڵی گشتیی فەرەنسا لە هەولێر بە ئاڤا نیوزی گوت "سەردانەکەی سەرۆکی فەرەنسا لە پلاندا بوو، بەڵام لەسەر داوای دەسەڵاتدارانی بەغدا دواخراوە و بۆ هەنگاوی داهاتووش چاوەڕێی بەغداین، سەردانەکە هەر دەکرێت و لە داهاتوویەکی نزیکدا سەردانی بەغدا و هەولێر دەکات". بەڵام هیچ ڕوونکردنەوەیەکی نەدا و ئاماژەی بە هۆکارەکەی نەکرد.

بابەتی ستراتیژی: کونسوڵخانەی فەرەنسا پرۆژەیەکی نوێ لە بواری شوێنەوارناسی لە هەولێر دەستپێکردووە، لەمبارەیەوە یان برەم گوتی: "کاری نێوان فەرەنسا و هەرێمی کوردستان زۆر گرنگە، لەبەرئەوەی پەیوەندییەکی دێرین و دۆستانەمان لە نێوانماندا هەیە، لە داهاتوودا دەتوانین پەیوەندییە ئابووری و چالاکییە کولتوورییەکان گەشە پێبدەین''.