سەرۆکی فەرەنسا سەردانی عێراق و هەرێمی کوردستان دەکات

ئاڤا نیوز

 

سەرۆک کۆماری فەرەنسا بۆ هەماهەنگی کاری ڕاوێژکارە فەرەنسییەکان و ئەرکەکانیان لە پشتیوانیکردنی پێشمەرگە و هێزە عێراقییەکان، بەم نزیکانە سەردانی عێراق و هەرێمی کوردستان دەکات.

 

ڕاگەیێنراوی فەرمی: پاتریک دۆرێل، باڵیۆزی فەرەنسا لە بەغدا لە کۆبوونەوەی لەگەڵ محەممەد شیاع سوودانی، سەرۆکوەزیرانی عێراق ڕایگەیاند: ئارەزووی ئیمانوێل ماکرۆن، سەرۆکی فەرەنسای بۆ سەردانیکردنی عێراق لە نزیکترین کاتدا نیشان دا، هەڵوێستی حکومەتی وڵاتەکەی دووپات کردەوە، بەمەبەستی کارکردن بۆ زیاتر پێشخستنی یاداشتەکانی لێکتێگەیشتنی نێوان پاریس و بەغدا و هەماهەنگیکردن لەبارەی پرسی ڕاوێژکارە فەرەنسییەکان و ئەرکیان لە پشتیوانیکردنی هێزە عێراقییەکان.

 

زانیاریی تایبەت: ئاڤا زانیویەتی، ئیمانوێل ماکرۆن دوای سەردانەکەی بۆ عێراق، سەردانی هەولێر دەکات و لەگەڵ بەرپرسانی باڵای هەرێمی کوردستان کۆدەبێتەوە. 

 

لەلایەکی دیکەوە: محەممەد شیاع سوودانی لە کۆبوونەوەکە جەختی کردەوە لەسەر هەڵوێستی عێراق لە بوونی هێزەکانی هاوپەیمانان لە عێراق و پێشکەوتنی توانای هێزە عێراقییەکان، هەروەها ڕایگەیاند، هەڕەشە و مەترسییەکانی داعش لەسەر ئاسایشی عێراق پاشەکشەیان کردووە، عێراق ئارەزووی ئەوە دەکات ئەو پەیوەندییەی ئێستا هەیە بگۆڕدرێت بۆ پەیوەندی دۆستانە لەگەڵ وڵاتانی هاوپەیمانی نێودەوڵەتی.