تەرمی ئاڤێستا ڕادەستی کەسوکارەکەی کرایەوە

ئاڤا نیوز

وەرگرتنی سامپل و پشکنینەکان بۆ تەرمی ئاڤێستا تەواو بوو، تەرمەکەی ڕادەستی کەسوکارەکەی کرایەوە و ئەمڕۆ لە دەڤەری بارزان بەخاك دەسپێردرێت.

چیرۆکی سەرەکی: دوێنێ یەکشەممە، لە گوندی ستریای سەر بە کۆمەڵگەی شەرەفۆنا کە دەکەوێتە سنووری ئاکرێ لە زێی گەورە، تەرمێک لەلایەن ماسیگرێک دۆزرایەوە، بەپێی هەندێک نیشانە و جلوبەرگەکەی دەرکەوت کە تەرمی ئاڤێستایە.

لێدوانی فەرمی: سەرچاوەیەک لە پەیمانگای پزیشکی دادی هەولێر، بە ئاڤای گوت: سامپل لە تەرمەکە وەرگیراوە، هەموو ڕێکارەکانی پشکنینی پزیشکی دادی بۆ تەرمەکە کراوە، تەرمەکە ڕادەستی کەسوکارەکەی کرایەوە بۆ ئەوەی بەخاک بسپێردرێت.

زانیاریی زیاتر: لەسەر داواکاری باوکی ئاڤێستا، تەرمی ئاڤێستا دەبرێتەوە بارزان و هەر ئەمڕۆ لە گۆڕستانی مەزاری نەمران لە بارزان بە خاک دەسپێردرێت و یەکەم ڕۆژی پرسە هەر لەوێ دەبێت و ڕۆژی دووەمیش لە هەولێر بەڕێوە دەچێت.

باکگراوند: ڕۆژی 5ـی نیسانی 2025، ئاڤێستا یوسف بەرزنجی لەگەڵ خێزانەکەی بۆ گەشت دەچنە سنووری مێرگەسۆری دەڤەری بارزان، لە زێی گەورە و لە شوێنێک کە تەنگاتوور ناسراوە، براكەی لەسەر بەردێك دەخزێت و دەكەوێتە نێو ئاو، ئاڤێستاش بۆ ڕزگارکردنی خۆی هەڵدەداتە نێو ئاوەکەوە، دواجار براكەی ڕزگاری دەبێت و ئاڤێستاش نووقم و بێسەروشوێن دەبێت و دەخنکێت.