دەستەبەری کۆمەڵایەتی: هەر خاوەنکارێک کار بە کرێکاری خۆماڵی نەکات دۆسیەکەی دەبەینە دادگا

ئاڤا نیوز

بەڕێوەبەری گشتیی دەستەبەری کۆمەڵایەتی دەڵێت، ئێستا زۆربەی خاوەنکاران لە هەرێمی کوردستان کار بە کرێکاری ناوخۆیی دەکەن، هۆشداریش دەداتە ئەو خاوەنکارانەی کە کار کرێکاری خۆماڵی ناکەن.

وێنە گەورەکە: لەماوەی ڕابردوودا لەلایەن حکومەتی هەرێمی کوردستانەوە بڕیار دەرچوو کە پێویستە خاوەنکار بە ڕێژەی 75% کرێکارەکانی ناوخۆیی بن و 25% كرێكاری بیانی بن.

لێدوانی فەرمی: مەریوان بەگۆک، بەڕێوەبەری گشتیی کار و دەستەبەریی کۆمەڵایەتیی حکومەتی هەرێمی کوردستان بە ئاڤا میدیای گووت، "هەرچەندە ئامارێکی دیاریکراومان لەبەردەست نییە، بەڵام زۆربەی خاوەنکاران تا کۆتایی ساڵی 2025 بڕیارەکەیان جێبەجێ کردووە، سەرباری ئەوەش هێشتا خاوەنکار هەیە بڕیارەکەی وەکو پێویست جێبەجێ نەکردووە".

- هۆشداریش دەدات ئەو خاوەنکارانەی بڕیارەکە جێبەجێ ناکەن، ڕێککار و لێپرسینەوەیان لەگەڵ دەکرێت تادەگاتە ئەوەی کەیسەکانیان ڕووبەڕووی دادگا بکرێتەوە، بۆ ئەو مەبەستە لێژنەکانی پشکنین، چاودێری و هەڵسەنگاندن بۆ ئەو خاوەنکارانە دەکەن کە ویستی جێبەجێکردنی بڕیارەکەیان نییە.

ئەوەی پێویستە بیزانیت: بڕیاری 172ـی تایبەت بە مسۆگەرکردنی مافی کار بۆ هاووڵاتییانی هەرێمی کوردستان و پابەندکردنی خاوەنکاران بە کارپێکردنی ڕێژەی 75%ـی هێزی دەستی کاری ناوخۆیی، وەک بڕیارێکی نیشتیمانی لە 2022-9-20 دەرچووە.

- ئەوکات ماوەی یەک ساڵ کات بە هەموو خاوەنکارێک درا لە دەستپێکی 2023 تا دەستپێکی 2024 پێویستە خۆیان لەگەڵ ئەو بڕیارە بگونجێنن، ئەو خاوەنکارانەی کە توانای جێبەجێکردنی بڕیارەکەیان نەبوو، بۆیان هەبوو داواکارییەک پێشکەش بکەن کە پێویستیان بە ماوەی زیاتر هەیە بۆئەوەی بڕیارەکە جێبەجێ بکەن.

زانیاریی زیاتر: بەمەبەستی چۆنیەتی جێبەجێکردنی بڕیارەکە، لیژنەیەکی باڵای بەدواداچوون پێکهێنرا و داواکاریی گشتی و دامەزراوە فەرمییەکان ڕاسپێردران کە پاڵپشت بن و ڕێککاری پێویست بگرنەبەر بۆ جێبەجێکردنی بڕیارەکە.