بۆچی لەنێو فۆڕمی هەڵبژاردنی سەركردایەتیی یەكگرتوو بازنەی هەڵەبجە نەبوو؟

ئاڤا نیوز 

 

یەكگرتووی ئیسلامیی كوردستان نۆیەمین كۆنگرەی خۆی ئەنجامدا و دوێنی یەكەم ڕۆژ و ئەمڕۆش كۆتا ڕۆژی كۆنگرەكەیە، یەكێك لەو خاڵانەی لەنێو كۆنگرەكە بووە جێی سەرنج، نەبوونی بازنەی هەڵەبجە بوو لەنێو فۆڕمی هەڵبژاردنی سەركردایەتیی یەكگرتوو، بەرپرسێكی حیزبەكە هۆكارەكەی دەخاتەڕوو.

لێدوانی فەرمی: مستەفا عەبدوڵڵا، سەرۆكی فراكسیۆنی یەكگرتوو لە پەرلەمانی كوردستان و ئەندامی كۆنگرەی نۆی حیزبەكە بە ئاڤای ڕاگەیاند: لە هەڵبژاردنی ئەنجوومەنی سەركردایەتیدا ئێمە پارێزگامان نەكردووە بە بنەما بەڵكو ناوەندەكانی ڕێكخستنمانی حیزبمان كردووە بە بنەما، لە ناوەندی ڕێكخستندا سلێمانی و هەڵەبجە، دهۆك و نەینەوا بەیەكەوەن، هاوكات ناوەندی ڕێكخستنی هەولێر و ناوەندی ڕێكخستنی كەركووكیشمان هەیە و لەسەر ئەو بنەمایە بازنەمان دیاركردووە.

 

ئەو ئەندامەی كۆنگرەی نۆی یەكگرتوو ڕاشیگەیاند: یەكگرتووی ئیسلامی یەكێكە لەو هێزانەی كە داكۆكیاری سەرسەختی بوون بە پارێزگای هەڵەبجەیە و ئێمە لە هەڵەبجە خۆمان بە كارەكتەرێكی كارا دەزانین.

 

ئەوەی پێویستە بیزانیت: لە كۆنگرەی نۆیەمی یەكگرتوو، سێ هەڵبژاردن بەڕێوەچوون، ئەوانیش بریتین لە ئەمینداری گشتی، ئەنجوومەنی سەركردایەتی و دەستەی باڵای بەدواداچوونی یەكگرتوو و ئەنجامەكانیش هەر زوو ڕاگەیێنران.

 

ئەوەش بزانە: سەڵاحەدین محەممەد بەهائەدین، بۆ جاری هەشتەم بۆ پۆستی ئەمینداری گشتیی یەكگرتووی ئیسلامی كوردستان هەڵبژێردرایەوە.