ئاڤا بەدواداچوون بۆ دابەشکردنی زەوی بەسەر فەرمانبەرانی سنووری ماددەی 140 دەکات

ئاڤا نیوز

پڕۆسەی دابەشکردنی زەوی بەسەر فەرمانبەرانی حکومەتی هەرێمی کوردستان بەردەوامە و لەداهاتوودا فەرمانبەرانی ماددەی 140یش لەو پڕۆسەیە سودمەند دەبن.

 

چیرۆکی سەرەکی: بە بڕیاری سەرۆکوەزیران بارزانی، پڕۆسەی دابەشکردنی زەوی بەسەر فەرمانبەرانی حکومەتی هەرێمی کوردستان دەستیپێکردووە، بەشێک لە وەزارەتەکان زەوییان بەسەر فەرمانبەرانیان دابەشکردووە، لە داهاتووشدا ئەوەی دەمێنێتەوە زەییان بەسەر دابەش دەکرێت، فەرمانبەرانی سنووری ماددەی 140یش بێ بەش ناکرێن و زەوییان بۆ دابیندەکرێت. 

 

لێدوانی فەرمی: سەربەست مەولود، بەڕێوەبەری یاسایی لە وەزارەتی شارەوانی و گەشتوگوزاری حکومەتی هەرێمی کوردستان، بە ئاڤا میدیای ڕاگەیاند: ئەو فەرمانبەرانەی کارتی زانیارییان سەربە پارێزگاکانی عێراقە یان سنووری ماددەی 140ە و فەرمانبەری حکومەتی هەرێمی کوردستانن، لە زەوی وەرگرتن بێ بەش نابن و لە سنووری بەڕێوەبەرایەتیی شارەوانییەکان زەییان پێدەدرێت. 

 

سەبارەت بە فەرمانبەرانی کەرکووک، سەربەست مەولوود باسی لەوەکرد: "تاوەکو ئێستا یەکلای نەکراوەتەوە کە لە کوێی زەوییان بۆ دابین دەکرێتم بڕیارە لە ئەنجوومەنی وەزیران ئەو پرسە یەکلای بکرێتەوە، بەدڵنیاییەوە بێ بەش نابن و زەوییان پێدەدرێت".

 

ئەوەی پێویستە بیزانیت: ئەگەر فەرمانبەرێک لە سنووری دهۆک دەوام بکات و کارتی زانیاریی پارێزگایەکی عێراق بێت، لە دەورووبەری پارێزگا یان شوێنی نیشتەجێبوونی زەوی پێدەدرێت، لە هەولێر و سلێمانیش پڕۆسەکە بەهەمان شێوەیە.