ژمارەیەک خوازیاری خوێندنی باڵا لەڕێگەی ئاڤا میدیاوە داوای چارەسەرکردنی گرفتەکەیان دەکەن

ئاڤا نیوز

 

بەهۆی بڕیارێکی وەزارەتی خوێندنی باڵا و توێژینەوەی زانستی، ژمارەیەکی زۆر خوازیاری خوێندنی باڵا لە ڕاوندی ساڵی ڕابردوو  کە لە تاقیکردنەوەی توانستی زانستی دەرنەچوون، سکاڵایان گەیاندووەتە ئاڤا و دەڵێن تکایە دەنگمان بگەیەنن.

 

وێنە گەورەکە: ساڵی پار کاتێک ڕاوندێکی نوێی خوێندن کرایەوە، چەند مەرجێک بۆ وەرگرتن دانرا، یەکێک لە مەرجەکان ئەوەبوو، ئەو قوتابییەی لە تاقیکردنەوەی توانستی زانستی لەسەر 30 لە 15 کەمتر بهێنێت بە کەوتوو هەژمار دەکرێت، بۆیە ژمارەیەکی زۆری بەشداربووان کەوتن.

دواتر چی؟

وەزارەتی خوێندنی باڵا و توێژینەوەی زانستی، بڕیارێکیدا هەر قوتابییەک لە خانەوادەی کەسوکاری سەربەرزی شەهیدانە، یان لە خانەوادەی زیندانییانی سیاسییە، یان قوتابی ناوچە کوردستانییەکانی دەرەوەی ئیدارەی هەرێمی کوردستانە ئەگەر لە تاقیکردنەوەی توانستی زانستی لەسەروو 10ـیان هێنابێت وەردەگیرێن.

 

گرفتەکە لێرە دەستپێدەکات!

لە پرۆسەکە سەروو 400 خوازیار دەمێننەوە کە ئەو مەرجانەی سەرەوەیان تێدا نییە، ئەوان بێ بەش دەبن و ژمارەیەکی زۆری خوازیاریش وەردەگیرێن، بۆیە لەو ڕۆژەوە ئەو قوتابییانە بۆ چەندین جار لەبەردەم وەزارەتی خوێندنی باڵا خۆپیشاندانیان کردووە، بەڵام بێ ئەنجام بووە.

 

لێدوانی فەرمی: لە بەدواداچوونێکی  ئاڤا میدیا بۆ گرفتی ئەم قوتابییانە، د.توانا نەجەف، بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا ڕایگەیاند: بەپێی ئەو ڕێنماییەی بۆ کردنەوەی ڕاوندێکی نوێی خوێندن ڕۆژی 24-12-2024 دەرچووە، وەزارەتی خوێندنی باڵا ڕایگەیاندووە، ئەو خوازیارانەی ساڵی ڕابردوو کەوتوون و وەرنەگیراون بە هەمان میکانیزمی قوتابییەکی نوێ دەبێت ئەمساڵیش ڕێکارەکان سەر لەنوێ دەستپێبکەنەوە. 

د.توانا نەجەف ئاماژە بەوەش دەکات: "جارێ تا داواکاری پێشکەشکردن دەستپێنەکات، ڕێنماییەکان بەمجۆرە دەبن، بەڵام ئەو کاتەی پێشکەشکردنی خوازیاران دەستی پێکرد، ڕەنگە بڕیاری نوێ دەربچێت".