جیاوازیی مووچە و کارگێڕی لەنێوان یەکەکانی 70 و 80 نامێنێت

ئاڤا نیوز

وەزارەتی پێشمەرگە دەستپێكی قۆناغێكی نوێی بۆ هێزەكانی پێشمەرگە ڕاگەیاندووە، لە ساڵی داهاتووەوە هیچ هێزێك بە ناوی یەکەکانی 70 و 80  نامێنێت، جیاوازیی مووچە لەنێوان پێشمەرگەکانیان نامێنێ و ئەفسەر و پلەدارەکانیش وەکو ئێستا نامێننەوە و گۆڕانکارییان بەسەردا دێت.

وێنە گەورەکە: پرۆسەی یەکخستنەوەی هێزەکانی پێشمەرگە بەسەرپەرشتیی ڕاوێژکارانی ئەمریکا و هاوپەیمانان بەردەوامە، ئێستا کار لەسەر یەکەکانی 70 و 80 دەکرێت کە بە هەردووکیان نزیکەی 100 هەزار پێشـمەرگەیان هەیە.


ئەوەی ئێستا ڕوودەدات: وەزارەتی پێشمەرگە بڕیاری داوە لە ساڵی نوێ (2025) سەرجەم هێزەكانی سەر بە یەكەکانی 70 و 80 بكرێنە 11 فرقەی سەربازی، ئەو 11 فرقەیەش دابەشی سەر دوو ناوچەی سەركردایەتیی دەكرێن، ئەمەش هەنگاوێكی دیكەیە بۆ ڕێکخستنەوە و یەکخستنەوەی هێزی پێشمەرگە لەژێر سەرپەرشتی وەزارەتی پێشمەرگەدا، هەروەك بەرپرسانی باڵای وەزارەتەکە ڕایانگەیاندووە، ئەمە دەستپێکی قۆناغێکی نوێ دەبێت.


ئەوەی پێویستە بیزانیت: بەپێی سیستەمی سەربازی، فرقەی سەربازی لە 10 تاوەكو 30 هەزار سەرباز و ئەفسەر و فەرماندە پێكدێت. هەر فرقەیەك سێ یان چوار لیوای دەبێت. هەر لیوایەك زیاتر لە سێ هەزار ئەندامی دەبێت و سێ یان چوار فەوجی دەبێت، تایبەت بە وەزارەتی پێشمەرگەش ژمارەی ئەندامانی هەر لیوا و فەوجێک دەکەوێتە سەر  هەردوو یەكەی 70 و 80 .


زانیاریی تایبەت: ئێستا مووچەی فەرماندەییەكانی یەكەکانی 70 و 80 جیاوازە لەگەڵ هێزەكانی سەر بە وەزارەتی پێشمەرگە، بە كۆكردنەوە و ڕێکخستنەوەیان  گۆڕانكاری بەسەر پێشمەرگە و ئەفسەر و پلەدارەكانیان دێت، هەروەك وەزارەتی پێشمەرگەش بەفەرمی ڕایگەیاندووە، بڕیاردراوە بە بنیاتنانی بنەماکانی یەکەیەکی یەکگرتووی ژمێریاریی سەربازی بۆ هێزی پێشمەرگەی کوردستان، بەمپییە لەمەودوا مووچەی هەموو پێشمەرگەیە وەك یەك دەبێت.