دادگای ئامەد بڕیار لەبارەی کەیسی کوشتنی نارین گورەن دەدات

ئاڤا نیوز

دادگای باڵای تاوانەکانی هەشتی دیاربەکر، بڕیاری لەبارەی دۆسیەی کوشتنی نارین گورەن دا و سزای بەسەر چوار کەسدا سەپاند.

چیرۆکی سەرەکی: نارین گورەن، کچە تەمەن هەشت ساڵەکەی ئامەدی باکووری کوردستان، دوای 19 ڕۆژ لە ونبوونی، تەرمەکەی لە ناو توورەکەیەکدا  لە گوندی تاشڤانتەپە لە کەناری ڕووبارێک دۆزرایەوە، ئەمەش بە گەورەترین تاوانی کوشتنی ئەمساڵی تورکیا و باکووری کوردستان دادەنرێت و زۆرترین کەسی خەمناک کرد.

 

ڕاگەیێنراوی فەرمی: دادگای باڵای تاوانەکانی هەشتی دیاربەکر ڕایگەیاند، یوکسێل گورەن دایکی و ئەنەس گورەن براگەورەی و سەلیم گورەن مامی بە زیندانی هەتاهەتایی بە تاوانی ئەنجامدانی کوشتنی نارین سزاداوە، هەروەها نەڤزاد بەهتیار بە تاوانی هاندەری تاوانەکە بە چوار ساڵ و 6 مانگ زیندانیکردن سزا دراوە.
 
باکگراوند: لە چوارچێوەی لێکۆڵینەوەکاندا کە لەلایەن سەرۆکایەتیی داواکاری گشتیی دیاربەکرەوە کراون، 12 کەس دەستگیرکرابوون کە لەنێویاندا باوک، دایک، براگەورە و مامی نارین و دراوسێیەکەیان هەبوون، بەڵام دواتر باوکی بێ تاوان دەرچوو.