ئەمساڵ ڕێکاری نوێ بۆ ڕێگری لە ڤیزای بازرگانی بۆ حەج دانراوە

ئاڤا نیوز

 

بەڕێوەبەرایەتیی حەج و عومرەی هەرێمی کوردستان، ڕێکاری نوێی داناوە بۆ ڕێگری لە دووبارە بوونەوەی ڕووداوی مردنی ژمارەیەکی زۆری حاجیان، ئەوانەی بە ڤیزای یەک ساڵەی بازرگانی و گەشتیاری چووبوون بۆ حەج.

 

وێنە گەورەکە: لە وەرزی حەجی ڕابردوو، ژمارەیەک کۆمپانیای ناوخۆیی لەڕێگەی دابینکردنی ڤیزای بازرگانی یەک ساڵەی سعودیی، دەرفەتی بەجێهێنانی حەجیان دابین دەکرد، بەڵام بەهۆی قەرەباڵغی و نەبوونی پلان و گەرمایەکی بەتین، 29 حاجی هەرێمی کوردستان گیانیان لەدەستدا.

 

لێدوانی فەرمی: کاروان ستوونی، بەڕێوەبەری ڕاگەیاندن و ئیرشاد لە بەڕێوەبەرایەتیی حەج و عومرە بە ئاڤا میدیای وت:

• 39 کۆمپانیا سزا دراون، 12 کۆمپانیا دوو ساڵ دوورخراونەتەوە لە بەشداریکردنی پرۆسەی حەج و یەک ساڵیش بۆیان نییە هاونیشتمانیان بۆ عومرە بگوازنەوە.
• 27 کۆمپانیاش یەک ساڵ لە پرۆسەی حەج دوورخراونەتەوە و شەش مانگیش بۆیان نییە پرۆسەی عومرە بە ئەنجام بگەیەنن.

 

کاروان ستوونی دەڵێت: لە 13-1-2025 لە سعودیە کۆڕبەندێک بۆ ڕێگری لە دووبارەبوونەوەی ڕووداوەکانی وەرزی حەجی ڕابردوو دەکرێت. هاوکات لیژنەیەک لە بەڕێوەبەرایەتیی حەج و عومرە بە بەردەوامی چاودێریی کۆمپانیاکان دەکات و بەڕێژەی 90% گرفتەکە کۆنترۆڵ کراوە.

 

ئەوەی پێویستە بیزانیت: لە مانگی ئابی ئەمساڵ بەڕێوەبەرایەتیی حەج و عومرەی هەرێمی کوردستان،  لەکۆی نزیکەی 200 کۆمپانیا، ناوی 97 کۆمپانیای بڵاوکردەوە کە تەنیا ئەو کۆمپانیانە بۆ حەج و عومرە ڕێگە پێدراون.