مونا قەهوەچی: بەغدا مووچەی كردووەتە هۆكارێك بۆ دژایەتیکردنی حکومەتی هەرێمی کوردستان

ئاڤا نیوز

 

مونا قەهوەچی، جێگری سەرۆکی پارتی چاکسازی تورکمان و پەرلەمانتاری كوردستان دەڵێت، "لەم قۆناغەدا پاراستنی قەوارەی دەستووریی هەرێمی کوردستان ئەرکێکی نیشتیمانیی هەموو تاکێکی دڵسۆزی کوردستانە".

 

لێدوانی فەرمی: مونا قەهوەچی بە ئاڤا میدیای ڕاگەیاند: ئەوەی بەغدا بەرامبەر مووچەخۆر و هاووڵاتیانی هەرێمی کوردستان دەیکات، دژ بە هەموو یاسا و دەقە دەستوورییەکان و بڕیاری دادگای فیدراڵییە، مانگ لە دوای مانگ بە بیانووی جیاواز مووچە دوادەخات، مووچەیان کردووەتە هۆكارێك بۆ لاوازکردن و دژایەتیکردنی حکومەتی هەرێمی کوردستان.

 

-  زۆر کەس و لایەن خۆیان کردبوو بە دەمڕاستی حکومەتی عێراق و دەیانگوت لەسەر مووچە لەگەڵ بەغدا ڕێکبکەون و ئیتر بەغدا هەموو مووچەی فەرمانبەرانی هەرێمی كوردستان دابین دەکات، خێرە ئێستا خۆتان بێدەنگ کردووە، خێرە ناپرسن کە بۆ حکومەتی عێراق بڕیاری دادگای فیدراڵی جێبەجێ ناکات؟

- حەق نییە بپرسین کە بۆ کێشەی نەختینە بۆ پارێزگاکانی تر نییە و مووچە لە کاتی خۆی دواناکەوێت؟

-لەم قۆناغەدا پاراستنی قەوارەی دەستووریی هەرێمی کوردستان ئەرکێکی نیشتیمانیی هەموو تاکێکی دڵسۆزی کوردستانە.

 

ئەوەی پێویستە بیزانیت: هەرچەندە مووچەی مانگی 12ـی فەرمانبەرانی عێراق دابەش كراوە، بەڵام عێراق تاوەكو ئێستا بڕی پارەی مووچەی مانگی 11ی فەرمانبەرانی هەرێمی كوردستانی نەناردووە و هەرێمی كوردستان بۆ پڕكردنەوەی كورتهێنانی مووچەی مانگی 11 پێویستی بە 600 ملیار دینارە.