هەوڵی دۆزینەوەی شوێنی ئەو کارگانە دەدرێت کە بە نایاسایی ڕۆنی ئۆتۆمبێل دروست دەكەن

ئاڤا نیوز

 

لە هەرێمی كوردستان بەدواداچوون دەكرێت بۆ دۆزینەوەی سەرجەم ئەو شوێن و كارگانەی كە بە نهێنی و نایاسایی ڕۆنی ئۆتۆمبێل دروست دەكەن و بە ڕۆنی براندی بەرز بە خەڵكی دەفرۆشنەوە.

 

وێنە گەورەكە: دوای بڵاوبوونەوەی گرتە ڤیدیۆی دروستكردنی ڕوونی ئۆتۆمبێل لە كارگەیەك و لەسەر داواكاری بەشێك لە هاووڵاتیان و شۆفێران، سەرۆكایەتیی داواكاری گشتیی بەدواداچوون بۆ ئەم دۆسیەیە دەكات و هەوڵی دۆزینەوەی سەرپێچیكارانی هاوشێوە دەدات.

 

نووسراوی فەرمی: بەگوێرەی نووسراوێكی فەرمی سەرۆكایەتیی داواكاری گشتیی هەرێمی كوردستان كە وێنەیەكی لای ئاڤا میدیا پارێزراوە، تێیدا گشتاندنی بۆ سەرجەم فەرمانگە پەیوەندیدارەكانی پارێزگا و ئیدارە سەربەخۆكان كردووە؛ بەدواداچوون بكەن بۆ پرسی دروستكردنی ڕۆنی ئۆتۆمبێل بە نایاسایی و سەرجەم کـارگـەکـانـى سنوورى دەسەڵاتی هەر فەرمانگە و یەكە ئیدارییەكان لە کاتى بوونى حاڵەتی هاوشێوە، ڕێكاری یاسایی بگیرێتە بەر و سەرپێچیكاران ڕووبەڕووی یاسا بكرێنەوە.

 

ئەوەی پێویستە بیزانیت: پێشتر ئاڤا لەڕێگەی بەرنامەی "بە ڕزگار بڵێ" بە هەماهەنگی لەگەڵ دەزگا ئەمنییەكان بەدواداچوونی بۆ ئەو گرفتە كردبوو كارگەیەكیش لەسەر دروستكردنی ڕۆنی ساختە داخرا.