چوار ئەندامی شانە نووستووەکانی داعش لە عێراق دەستگیرکران

ئاڤا نیوز

 

هێزە ئەمنییەکانی عێراق و هەرێمی کوردستان چوار ئەندامی داعش دەستگیردەکەن کە بەگوێرەی یاسای تیرۆر داواکراوبوون و تۆمەتی ئەنجامدانی هێرشیان بۆسەر هێزە ئەمنییەکان و هاووڵاتیانی مەدەنی لەسەرە.

 

وێنە گەورەکە: هەرچەندە لە ساڵی 2017ـەوە کۆتاییهاتنی داعش لە عێراق ڕاگەیێنراوە، بەڵام شانە نوستووەکانی ڕێکخراوەکە هێشتا ماون و هەندێکجار هێزە ئەمنییەکان و هاووڵاتیانی عێراق بە ئامانج دەگرن.

 

ڕاگەیێنراوی فەرمی: دەزگای ئاسایشی نیشتمانی عێراق بڵاویکردەوە، بە هەماهەنگی لەگەڵ دەزگای ئاسایشی هەرێمی کوردستان، چوار ئەندامی داعشیان دەستگیرکردووە، دووانیان لە "ویلایەتی ئەنبار"ی ڕێكخراوەکە و لەبواری بەرهەمهێنانی مووشەک و کەرەستەی سەربازیدا کاریانکردووە، دووانەکەی دیکەش لە "ویلایەتی نەینەوا و دیجلە"ی داعشدا ئەندامبوون و بەشداربوون لە ئەنجامدانی هێرشی تیرۆرستی بۆسەر هێزە ئەمنییەکان و هاووڵاتیانی مەدەنی.

 

دەزگای ئاسایشی نیشتمانی ڕاشیگەیاندووە، تۆمەتبارەکان بەڵگەنامەی ساختەیان بۆ هاتووچۆکردن بەکارهێناوە تا لە چاودێریی هێزە ئەمنییەکان دووربن، هەر چوار تۆمەتبارەکەش ڕەوانەی دادگا کراون تاوەکو بەپێی تۆمەتەکانیان سزابدرێن.