ئاڤا بەدواداچوون بۆ کێشەی زەویی مامۆستایانی زانکۆی سلێمانی دەکات

ئاڤا نیوز

 

ژمارەیەک مامۆستای زانکۆی سلێمانی باس لەوە دەکەن، زەوییان بۆ دابینکراوە و لەلایەن کۆمپانیایەکەوە دەستی بەسەردا گیراوە و داوایان لە ئاڤا میدیا کرد بەدواداچوون بۆ کێشەکەیان بکات.

 

وێنە گەورەکە: دوای ئەوەی ژمارەیەک مامۆستای زانکۆی سلێمانی گازەندەی ئەوەیان کرد، ئەو زەوییەی بۆیان دیاریکراوە پێیان بدرێت لەلایەن کۆمپانیایەکەوە دەستی بەسەردا گیراوە و لێپرسراوی ڕاگەیاندنی سەرۆکایەتیی زانکۆی سلێمانی ڕەتی دەکاتەوە.

 

لێدوانی فەرمی: د. یۆهان عوسمان، لێپرسراوی ڕۆشنبیری و ڕاگەیاندنی زانکۆی سلێمانی بە ئاڤا نیوزی ڕاگەیاند: ئەو زەوییەی باس دەکرێت چیرۆکێکی دوور و درێژە و بە زانکۆی سلێمانی نەدراوە، ئەوەی لەبارەیەوە دەگوترێت ڕاست نییە، بەڵکو بە بڕیاری ئەنجوومەنی وەزیران بەو کۆمپانیایە دراوە.

 

زانیاریی زیاتر: د. یۆهان عوسمان ئەوەشی گوت: ئەو زەوییەی بە کۆمپانیاکە دراوە، لە تەنیشت هەواری فەرمانبەرانی زانکۆیە، بەڵام بۆ فەرمانبەر و مامۆستای زانکۆ دانەنرابوو، ئێمە لیستی ئەو مامۆستا و فەرمانبەرانەی لە وەرگرتنی زەوی سوودمەند نەبوون بۆ شارەوانی و وەزارەتمان بەرزکردووەتەوە.

 

لەلایەکی دیکەوە: زەردەشت ڕەفیق، گوتەبێژی سەرۆکایەتیی شارەوانیی سلێمانی دەڵێت: مامۆستایانی زانکۆش وەک سەرجەم فەرمانبەرانی دیکە زەوییان پێدەدرێت لەو سێ شوێنەی بۆیان دیاریکراوە.

 

زانیاریی بەدەستهاتوو: زانکۆی سلێمانی دوو هەزار و 300 مامۆستای دامەزراوی هەیە.