نەتانیاهۆ بەشداربوونی لە ڕێوڕەسمی دەستبەکاربوونی ترەمپ هەڵدەوەشێنێتەوە

ئاڤا نیوز

 

کەسێکی نزیک لە بنیامین نەتانیاهۆ ئاشکرای دەکات، سەرۆکوەزیرانی ئیسرائیل بەشداربوونی لە ڕێوڕەسمی سوێندخواردنی ترەمپ بۆ دەستبەکاربوونی وەک سەرۆکی ئەمریکا هەڵوەشاندووەتەوە، بەڵام  تاوەکو ئێستا هیچ وردەکارییەکی لەوبارەی نەخستووەتەڕوو.

 

چیرۆکی سەرەکی: وا بڕیارە لەم مانگەدا دۆناڵد ترەمپ، سەرۆکی هەڵبژێردراوی ئەمریکا بە بەشداری و بە ئامادەبوونی چەندین سەرۆک و سەرکردەی وڵاتان، ڕێوڕەسمی دەستبەکاربوونی بۆ ڕێکبخرێت، بەڵام لەم نێوەندەدا بنیامین نەتانیاهۆ، سەرۆکوەزیرانی ئیسرائیل بەشداربوونی لە ڕێوڕەسمەکەدا هەڵوەشاندەوە.

 

ڕاگەیێنراوی فەرمی: ڕۆژنامەی "زەسەنی بەریتانی" لە زاری کەسێکی نزیکی نەتانیاهۆ بڵاویکردەوە، بنیامین نەتانیاهۆ لە ڕێوڕەسمی سوێندخواردنی دۆناڵد ترەمپ ئامادە نابێت، لەگەڵ ئەوەشدا هیچ وردەکارییەکی زیاتری لەبارەی هۆکاری هەڵوەشاندنەوەی گەشتەکەی نەتانیاهۆ بۆ ئەمەریکا بڵاونەکردووەتەوە.

 

ئەوەی پێویستە بیزانیت: نەتانیاهۆ لەکاتی سەرکەوتنی دۆناڵد ترەمپ لە هەڵبژاردنەکاندا پیرۆزبایی لێکرد و ڕایگەیاند، "گەڕانەوەی مێژووی ئێوە بۆ کۆشکی سپی سەرەتایەکی نوێیە بۆ ویلایەتە یەکگرتووەکانی ئەمریکا و نوێبوونەوەیەکی بەهێزە بە هاوپەیمانێتییە مەزنەکەی نێوان ئیسرائیل و ئەمریکا".

 

ئەمەش بزانە: کاربەدەستانی ئیسرائیل لە چەند هەفتەی ڕابردوودا ڕایانگەیاندبوو، چاوەڕوان دەکرا نەتانیاهۆ ئەو سەردانە ئەنجام بدات، بەڵام ئەگەر گۆڕانکاری نەکات لە دوایین خولەکدا ئەوا ئەو سەردانە ناکات.