د. ڕێبین سەلام: عێراق نیوەی شایستە داراییەکانی هەرێمی کوردستانی ناردووە

ئاڤا نیوز

 

ئەمڕۆ شەممە کۆبوونەوەیەکی نائاسایی ئەنجوومەنی وەزیرانی هەرێمی کوردستان بە سەرپەرشتیی سەرۆکوەزیران مەسرور بارزانی بەڕێوەدەچێت، کە نوێنەرانی هەرێمی کوردستان لە حکومەتی فیدراڵی و سەرۆکی فراکسیۆنە کوردستانییەکان بەشدار دەبن. هاوکات شارەزایەکی بودجەی عێراق دەڵێت، ساڵی ڕابردوو بەغدا نیوەی شایستە داراییەکانی هەرێمی کوردستانی ناردووە.

 

وێنە گەورەکە: لە بەرامبەر پابەندنەبوونی حکومەتی عێراق بە بڕیاری دادگای فیدراڵی و یاسای بودجە و ڕێککەوتنەکان بۆ ناردنی مووچە، حکومەتی هەرێمی کوردستان بیر لە هەڵوێستی "تووند" بەرامبەر بەغدا دەکاتەوە.

 

لێدوانی فەرمی: د. ڕێبین سەلام، شارەزا لە بودجەی عێراق بە ئاڤا میدیای ڕاگەیاند: "لە ساڵی 2024 ئەزموونێکی تاڵمان لە ناردنی بودجەدا هەبووە، ساڵی ڕابردوو نیوەی شایستە داراییەکانی هەرێمی کوردستان نێردراوە، عێراق ویستویەتی دژایەتی و دووبەرەکی لە نێوان خەڵکی هەرێمی کوردستان و لایەنە سیاسییەکانی دروست بکات، بەڵام سەرکەوتوو نەبووە تێیدا".

 

بە گوتەی د. ڕێبین، لە عێراق هەفتەیەک مووچە دوا دەکەوێت، ئاگرێک دەنێنەوە بەهیچ ناکوژێتەوە، بەڵام خەڵکی هەرێمی کوردستان خۆڕاگرە و شەڕی ئیرادەی لەگەڵ دەکرێت.

 

زانیاریی زیاتر: بودجەی حەشدی شەعبی و گرووپە چەکدارەکان نزیکەی دوو ئەوەندی هەرێمی کوردستانە، لایەنە شیعییەکان دەیانەوێت حەشد بکەنە بەشێک لە سوپای عێراق.