پەیامێکی تایبەت لە مەسرور بارزانییەوە لەبارەی هەڵبژاردن

ئاڤا نیوز

 

لەبارەی هەڵبژاردن سەرۆکوەزیران مەسرور بارزانی داوای ئەنجامدانی بانگەشەیەکی هەڵبژاردنی ئارام و دوور لە کێشە و گرفت لە سەرجەم لایەنە سیاسییەکان دەکات.

 

چیرۆکی سەرەکی؛ بەسەرپەرشتیی سەرۆکوەزیران مەسرور بارزانی، ئەمڕۆ چوارشەممە 15-10-2025 ئەنجوومەنی وەزیرانی هەرێمی کورستان کۆبووەوە، چەند پرسێکی تایبەت بە بانگەشەی هەڵبژاردن، داهاتی ناوخۆ، مووچە و بودجە گفتوگۆیان لەبارەوە کرا.

 

وێنە گەورەکە؛ بانگەشەی هەڵبژاردنی پەرلەمانی عێراق لە ڕۆژی هەینی، 3ی تشرینی یەکەمی 2025 دەستیپێکردووە و بڕیارە تا 8ی تشرینی دووەمی 2025 بەردەوام بێت. کۆمسیۆنی باڵای سەربەخۆی هەڵبژاردنەکان کۆمەڵێک ڕێنمایی بۆ لایەنە سیاسییەکان و بەربژێرەکان دەرکردووە بەمەبەستی دڵنیابوون لە بەڕێوەچوونی بانگەشەیەکی شارستانی و دوور لە پێشێلکاری.

 

پەیامی تایبەت؛ پێشەوا هەورامانی، گوتەبێژی حکومەتی هەرێمی کوردستان بە ئاڤای ڕاگەیاند، "لە سەرەتای کۆبوونەوەی ئەمڕۆی ئەنجومەنی وەزیراندا، مەسرور بارزانی، سەرۆکوەزیرانی هەرێمی کوردستان، ئاماژەی بە دەستپێکردنی بانگەشەی هەڵبژاردنی پەرلەمانی عێراق کرد و داوای لە هەموو لایەنە سیاسییەکان و کاندیدەکان کرد کە پابەندی ڕێنماییەکان بن.

 

زانیاریی زیاتر: بەگوتەی پێشەوا هەورامانی، سەرۆکوەزیران جەختی لەوە کردەوە کە پێویستە بانگەشەکان بە شێوەیەکی ئارام و مەدەنی بەڕێوەبچن، دوور لە هەر جۆرە گرژی و ئاڵۆزییەک.