هەولێر و بەغدا دەست بە گفتوگۆی بودجە دەکەن؛ بەمزووانە شاندێک دەچێتە بەغدا

ئاڤا نیوز

 

پێشەوا هەورامانی دەڵێت، هەولێر و بەغدا دەستیان بە گفتوگۆی بودجەی ساڵی 2026 کردووە، بەمزووانەش شاندێکی هەرێمی کوردستان بۆ ئەم بابەتە دەچێتە بەغدا.

 

وێنە گەورەکە: لە بودجەی عێراق بۆ ساڵانی 2023، 2024 و 2025 ڕێژەی لە 12.67٪ بۆ هەرێمی کوردستان لە یاسای بودجەدا پەسەند کرا، بەڵام حکومەتی عێراق یاساکەی بودجەی وەکخۆی جێبەجێ نەکردووە. حکومەتی هەرێمی کورستانیش کار لەسەر ئەوە دەکات ماف و شایستە داراییەکان و داوکارییەکانی لە بودجەی ساڵی 2026 دا بچەسپێنێت.

لێدوانی فەرمی: پێشەوا هەرامانی، گوتەبێژی حکومەتی هەرێمی کوردستان بە ئاڤا میدیای گوت: لەگەڵ حکومەتی عێراق کەوتووینەتە ناو گفتوگۆی بودجەی ساڵی 2026، بۆ ئەم مەبەستە بەمزووانە شاندێکی هەرێمی کوردستان دەچێتە بەغدا.

 

زانیاریی زیاتر: بەگوتەی پێشەوا هەورامانی هەرێمی کوردستان داوای کردووە بەشە بودجەی هەرێمی کوردستان لەسەر بنەمای ڕێژەی دانیشتوان دیاری بکرێت.

 

بە تەنیشت ئەم بابەتەوە؛ بەپێی ڕێککەوتنی سێ قۆڵی نێوان هەرێمی کوردستان و حکومەتی عێراق و کۆمپانای نەوتییەکان، هەناردە کردنی نەوتی هەرێمی کوردستان و بەبازاڕکردنی لە ڕێگەی سۆمۆ بەردەوام دەبێت تا بودجەی ساڵی 2026 پەسەند دەکرێت.