دەوڵەتی یاسا: هەڵبژاردن لە کاتی خۆیدا دەکرێت

ئاڤا نیوز

 

هاوپەیمانیی دەوڵەتی یاسا لە هەڵوێستێکی پێشووی پاشگەز دەبێتەوە کە داوای کردبوو هەڵبژاردنی پێشوەختەی پەرلەمانی بکرێت، لە دوایین هەڵوێستی هاوپەیمانیەتییەکە ئاماژە بۆ ئەوە دەکات کە هەڵبژاردن لە کاتی خۆیدا بکرێت.

 

وێنە گەورەکە: تەنیا 10 مانگ لە تەمەنی پەرلەمانی عێراق ماوە، بەپێی دەستوور دەبێت لە مانگی تشرینی یەکەمی ئەمساڵ هەڵبژاردنی پەرلەمان بکرێت، بەگوێرەی لایەنە سیاسییەکان دەرفەتی ئەنجامدانی هەڵبژاردنی پێشوەختە لەئارادا نییە.

 

ڕاگەیێنراوی فەرمی: عەقیل فەتلاوی، وتەبێژی هاوپەیمانیی دەوڵەتی یاسا بە میدیا عێراقییەکانی ڕاگەیاند: باسی ئەنجامدانی هەڵبژاردنی پێشوەختە لەلایەن هێزە سیاسییەکان لەئاراد نییە، لەئێستادا ناوچەکە ناسەقامگیرە بۆیە ناکرێت هەڵبژاردنی پێشوەختە بکرێت کە ڕەنگە بۆشایی سیاسی بەدوای خۆیدا بێنێت بەڵکو هەڵبژاردن لە کاتی دیاریکراوی خۆیدا دەکرێت.

 

ئەوەی پێویستە بیزانیت: ئەم هەڵوێستەی دەوڵەتی یاسا لە کاتێکدا، نووری مالیکی لە مانگی حوزەیرانی ساڵی ڕابردوو داوای کرد هەڵبژاردنی پێشوەختە لە کۆتایی ساڵ بکرێت، بەڵام هێزە سیاسییەکان بە تایبەتی چوارچێوەی هەماهەنگی ئەو داوایانەی ڕەتکردەوە.